क्यान्सर लागेर सिकिस्त भई नयाँ दिल्लीमा उपचार गराइरहेका पूर्वप्रधानमन्त्री मरिचमान सिंह श्रेष्ठको परिवारले उनको उपचारमा आर्थिक सहयोग गर्न सार्वजनिक अपिल गरेको छ । परिवारको सार्वजनिक अपिलपछि शुभेच्छुकहरूबाट केही सहयोग प्राप्त भएको जानकारी उनका छोरा अनिल श्रेष्ठले दिएका छन् ।
पञ्चायती व्यवस्थाको उत्कर्षकालमा चार वर्ष नेपालका प्रधानमन्त्री बनेका सिंहको उपचार अहिले नयाँ दिल्लीस्थित मेदान्त सिटी अस्पतालको आइसियुमा भइरहेको छ । फोक्सोको क्यान्सरमा थप संक्रमण भएपछि ७१ वर्षीय सिंहलाई किमोथेरापीका लागि दस दिनअघि मेदान्त लगिएको थियो । अहिले उनको स्वास्थ्यमा केही सुधार आए पनि स्थिति गम्भीर रहेको छोरा श्रेष्ठले जानकारी दिए ।
‘बुबाको उपचारमा धेरै पैसा खर्च भएको छ, अहिले हामीलाई थप उपचार गर्न खर्चकै अभाव भएको छ, त्यही भएर शुभेच्छुकहरूलाई सहयोग गर्न सार्वजनिक अपिल गरेका हौं,’ श्रेष्ठले भने । सिंहलाई अझै केही दिन मेदान्तमै राखेर उपचार गर्नुपर्ने छोरा अनिलले जानकारी दिए । यसअघि आठ हप्ता उनलाई मेदान्तमा राखेर उपचार गरिएको थियो ।
सिंहका छोरा अनिलले सार्वजनिक गरेको बुबाको अपिलमा ‘पूर्वप्रधानमन्त्रीको हैसियतले राष्ट्रबाट उपचार खर्च पाउनु उहाँको अधिकार हो, निष्कलंक, राष्ट्रवादी छविका मरिचमान सिंह श्रेष्ठलाई सहयोग गर्न सरकारलाई दबाब दिन राजनीतिक पार्टीका नेताहरूलाई आग्रह गर्नुभएको छ’ उल्लेख छ ।
छोरा श्रेष्ठले ‘जीवनको अन्तिम अवस्थामा आर्थिक अभावका कारण सिंहको उपचारमा कमी आउनु राष्ट्रकै दुर्भाग्य’ भएको उल्लेख गरेका छन् ।
पञ्चायती व्यवस्थाको अन्तिम समयमा उनलाई हटाएर केही दिन तत्कालीन राजा वीरेन्द्रले लोकेन्द्रबहादुर चन्दलाई प्रधानमन्त्री बनाएका थिए । त्यसको केही दिनमै २०४६ चैत २६ गते वीरेन्द्रले नेपालमा बहुदलीय व्यवस्था स्थापनाको घोषणा गरेका थिए । प्रधानमन्त्री बन्नुअघि उनी राष्ट्रिय सभाको सभामुख थिए । उनी नेवार समुदायबाट प्रधानमन्त्री बन्ने पहिलो व्यक्ति हुन् ।
