नेकपा एमालेका स्थायी कमिटी सदस्य सुरेन्द्र पाण्डेले एकीकृत नेकपा माओवादी शान्ति प्रकृयामा आएपनि संवैधानिक र शान्ति प्रकृयाको बाटोमा अभ्यस्त हुन नसकेको बताएका छन्।
संवैधानिक बाटो र युद्धको बाटोमा फरक छुट्टाउन नसक्नु उसको कमजोरी रहेको औंल्याउदै आफ्ना गल्ती र कमजोरी सच्चाउदै गल्ती स्वीकार गरी सहमतीको बाटोमा आउने विश्वास व्यक्त गरे।
प्रेस चौतारी नेपाल रुपन्देहीले शनिबार आयोजना गरेको पत्रकार सम्मेलनमा बोल्दै नेता पाण्डेले अब एमाओवादीले जतिसुकै प्रयास गरेपनि संबैधानिक बाटो छोडेर जाने बाटो बन्द भएको दावी गरे। नेत्रविक्रम चन्द र मोहन बैद्यको बाटोमा लाग्न एमाओवादी नसक्ने भन्दै नेता पाण्डेले प्रकृया र शान्तिपूर्ण बाटोमा हिंड्ने हो भने सहमती भन्दा अर्को विकल्प नभएको बताए।
संविधानमा सबैको कुरा लागू हुन्छ भन्ने सोचाई राख्न नहुने बताउँदै आफूहरुलाई पनि एमालेका सबै कुरा पारित गर्न सकिन्छ भन्ने नलागेको र त्यो लागू हुनपनि नसक्ने बताए। एमाले कांग्रेस र माओवादीका कतिपय कुराहरु आफ्नै पार्टिभित्रै समेत लागू नहुने गरेको उल्लेख गर्दै संविधानमा आफ्ना मात्रै कुरा राख्छु भन्नु गलत भएको बताए।
संवैधानिक अदालत र समानुपातिकको सवालमा यसअघि सहमती भएको स्मरण गर्दै उनले संघियतामा पनि सहमती हुनुपर्ने बताए। विभिन्न मुलुकहरुमा संघीयता लागू गर्दा थोरै प्रदेश भएपनि समयको विकाससँगै प्रदेश थपिदै गएको उदाहरण दिंदै नेपालमा पनि त्यस्तो गर्न सकिने उनको भनाई थियो।
एमाले अध्यक्ष केपी ओलीलाई विदेशी मुलुकबाट दवाव परेको हो? भन्ने पत्रकारहरुको जिज्ञासाको जवाफ दिंदै नेता पाण्डेले सुझाव दिन जसले पनि सक्ने तर नेपाललाई लाभ हुने र नहुने सुझावहरु छुट्टाउने काम नेपालको भएको बताए।
