नेकपा एमाले पार्टीकी उपाध्यक्ष विद्या भण्डारीले संविधानलाई रोकेर अहिलेको अवस्थामा एमाओवादीले भनेजस्तो संवाद र वार्ता हुन नसक्ने बताएकी छन्।
आजदेखि धरानमा सुरु भएको सुनसरी स्तरीय अगुवा कार्यकर्ता भेलाको उद्घाटन कार्यक्रममा बोल्दै उपाध्यक्ष भण्डारीले प्रक्रियामा एकछिन पनि अलमल नगरीकन संविधान बनाउने तर्फ अघि बढ्ने बताइन्। उनले भनिन् 'अहिले पनि माओवादीहरु संविधान सभालाई रोक्ने प्रयासमा लागिरहेको छन्। तर, हामी उनीहरुको रोकाईबाट रोकिदैनौं। जनतालाई संविधान दिई छाड्छौं।'
दुई तिहाई जनताको भोटलाई खेर जान नदिने र पार्टीले संविधान जारी गरि छाड्ने दाबी गरेकी छन्। उनले अहिले एमाओवादीले भनेजस्तो सहमति सहमति भन्दै घुडा टेकाउने प्रयास गरिरहेकाले हामी नभई उनीहरुलाई नै घुटा टेकाउने बताइन्।
'कांग्रेस एमालेसँग सम्झौता एमाओवादीले गर्नुपर्छ।, उनले भनिन् 'हामी उनीहरुसँग घुडा टेक्दैनौ, हामीसँग उनीहरुले घुडा टेक्नु पर्छ।, उनले संविधानको बाधक पनि एमाओवादी मोर्चा नै बनिरहको आरोप लगाइन्। उनले यो संविधान सभाबाट संविधान बनाएरै छाड्ने दाबी गरिन्। नेपाल संघीय लोकतान्त्रिक, गणतान्त्रिक संविधान बनाउनेमा दुईमतै नभएको उनको भनाई थियो।
प्रदेशको हकमा एमाले ७ प्रदेश भन्दा बढी जान नसक्ने बताउँदै संघीयता बनाउने भनेको जनतालाई अधिकार सम्पन्न बनाउने कुरा भएकाले सात प्रदेश माथि जान नसक्ने दाबी उनले गरेकी छन्। कार्यक्रममा कोशी अञ्चल कमिटी इन्चार्ज जीवन घिमिरेलेसमेत सम्बोधन गरेका थिए। पार्टी अध्यक्ष द्धारिकालाल चौधरीको सभापतित्वमा सुरु भएको अगुवा कार्यकर्ता भेलामा सुनसरी ६ क्षेत्रका करिव २ सय कार्यकर्ताहरु सहभागी छन्।
शनिबारसम्म चल्ने कार्यक्रममा पहिलो दिन पार्टी उपाध्यक्ष युवराज ज्ञवाली, पूर्व केन्द्रीय सदस्य मोदनाथ प्रश्रित, पोलिटव्युरो सदस्य परशुराम मेघी गुरुगले प्रशिक्षण गराउने छन्। दोस्रो दिन पोलिटव्युरो सदस्य संकर पोखरेल, डा. पुष्प कडेल, कोशी अञ्चल कमिटी सह इन्चार्ज धर्मराज निरौला र समापनमा महासचिव इश्वर पोखरेलले प्रशिक्षण गराउने कार्यक्रम रहेको छ।
