भारतमा नरेन्द्र मोदीको सरकारले भर्खरै विदेश सचिवलाई नियमित अवकाश पाउनु अघि नै पदबाट हटाएको छ। अवकाश पाउन ७ महिना बाँकी रहेकी सुजाथा सिंहको सट्टा सुव्रमन्यम जयशंकरलाई विदेश सचिव बनाउनुको कारण सिंहले भारतका छिमेकीसँग प्रभावकारी कुटनीति बनाउन नसक्नु भएकोे भारतीय सञ्चारमाध्यमहरूले जनाएका छन्।
समाचारमा जनाएइअनुसार छिमेकी नेपाल, भुटानसहित सार्क राष्ट्र र म्यानमारसँग सुमधुर सम्बन्ध बनाउन तल्लीन मोदी सरकार सिंहको यी छिमेकीसँगको कुटनीतिमा प्रभावकारी भूमिका नभएकाले उनलाई हटाउने निर्णयमा पुगेको हो।
सिंह विदेश सचिव हुदाँ सार्कको अवसरमा मोदीको काठमाडौं बाहिरको भम्रण अन्यौल बन्यो। जनकपुर, मुक्तिनाथ र लुम्विनी जाने कार्यक्रम तय भएको भनिएपनि अन्तिम अवस्थामा तीनै ठाउँको भ्रमण रद्ध गरियो। दुई देशका अधिकारीबीच प्रभावकारी समन्वय नहुँदा नेपालका मन्त्री र र भारतीय राजदूतले भ्रमण बारे फरक फरक जानकारी दिए।
मोदीको नेपाल भ्रमण लगायत चिनियाँ राष्ट्रपति सी जीनपिङको भारत भ्रमण, भारत पाक सम्बन्ध र भारतको अमेरिकासँगको कुटनीतिमा पनि असफल देखिनु सुजाथालाई हटाउनुको कारण भएको समाचारमा उल्लेख गरिएको छ।
कार्यकाल पूरा नगरी अवकाश पाउने सुजाथा भारतको दोस्रो सचिव हुन्। यसअघि १९८७ मा राजिव गान्धी प्रधानमन्त्री हुँदा एपी भेन्काटेश्वरनलाई पदावधी पहिले नै हटाइएको थियो।
