सत्तारूढ दल नेकपा एमालेले संविधान जारी गर्न वार्ता र प्रक्रिया सँगसँगै अगाडि बढाउने निर्णय गरेको छ। पार्टी मुख्यालय बल्खुमा बिहीबार बसेको स्थायी कमिटीको बैठकले वार्ता र प्रक्रिया सँगसँगै अगाडि बढाउने निर्णय गरेको बैठकमा सहभागी एक नेताले बताए।
सहमतिको लागि लामो समयसम्म प्रयास गर्दापनि सहमति हुन नसकेकाले प्रक्रिया सुरू गरिएको निष्कर्ष निकाल्दै बैठकले प्रक्रियामा गएपनि सहमतिको सम्भावना अझै नसकिएको निष्कर्ष निकालेको छ।
सहमतिको प्रयास निकै गरिएपनि विपक्षी मोर्चाले विभिन्न बहानामा समय लम्ब्याउने रणनीति लिएको भन्दै गत ११ गते प्रश्नावली समिति गठनको लागि प्रस्ताव निर्माण समिति घोषणा गर्ने संविधानसभा अध्यक्षको काम सही भएको निष्कर्ष निकालेको बरिष्ठ नेता झलनाथ खनालले जानकारी दिए ।
यसैबीच संघीयताको विषयमा पार्टीको अडान परिवर्तन हुन नसक्ने भन्दै एमालेले सात प्रदेशमा सहमति नहुने भए संघीयताको विषयमाथि अझै केही समय छलफल चलाउनुपर्ने बताएको छ।
प्रश्नावली निर्माणको प्रक्रिया प्रारम्भ भए पनि वार्ता र संवादको माध्यमबाट सहमति खोज्ने प्रयाश जारी नै रहेको भन्दै एमाओवादी लगायतका विपक्षी दलहरूलाई बहिष्कार, निषेध र सडक आन्दोलनको बाटो छाडेर सहमतिको प्रक्रियामा सामेल हुन र सङ्घीय लोकतान्त्रिक गणतन्त्रको संविधान निर्माण गर्ने ऐतिहासिक अभिभाराबाट विमुख नहुन पुनः आह्वान गरेको छ।