मानवअधिकार हननका घटनालाई सम्बोधन गर्न नेपाल सरकार असफल रहेको संयुक्त राष्ट्रसङ्घीय मानवअधिकार समितिले जनाएको छ।
एघार वर्षअघि काभ्रेपलाञ्चोक जिल्ला पोखरीचौर गाविसका छात्रा सुभद्रा चौलागाईलाई नेपाली सेनाले पक्राउ गरी निर्ममतापूर्वक हत्या गरेको घटनामा छानविन गरी दोषीमाथि कारबाही गर्न तदारुकता नदेखाएको भन्दै समितिले यस्तो आरोप लगाएको हो ।
एडभोकेसी फोरमको सहयोगमा सुभद्राका बाबु केदारनाथ चौलागाईले समितिमा उजुर गरेका थिए।
समितिको ध्यानाकर्षण बारे जानकारी दिन एड्भोकेसी फोरमले आयोजना गरेको कार्यक्रममा चौँलागाईँले घटना संझे - २०६० फागुन १ गते राति सेनाको समूहले ढोका खोल्न लगाए, घरभित्र छिरेर छोरी सुभद्रालाई लछारपछार गरे। तल ल्याएर उनको ठाउको बजारे, पर लगेर पेटमा गोली हाने, उनी लडेपछि बन्दुकको कुन्दा र लात्तीले टाउको बजारे त्यसपछि मलाई पनि कुटेर मर्यो होला भनी छोडेका थिए।
आफूले नेपालमा न्याय नपाएकैले जेनेभास्थित मानवअधिकार समितिमा उजुरी गर्न बाध्य हुनुपरेको उनले बताए। सो समितिले भनेबमोजिम आफ्नो मुद्दामा सरकारले न प्रभावकारी अनुसन्धान गरी कारबाही अघि बढायो, नत उचित क्षतिपूर्ति नै दियो।
एड्भोकेसी फोरमका कार्यकारी निर्देशक त्रिलोचन ले सरकारले अन्तर्राष्ट्रिय क्षेत्रमा जनाएको प्रतिवद्धता जनाएअनुसार पीडितलाई न्याय दिलाउन नसके अन्तर्राष्ट्रिय अधिकारक्षेत्र आकर्षित हुने बताए।
