एमाओवादी पार्टीले सविधानसभा अध्यक्षलाई असहयोग गर्ने घोषणा गर्दै संविधासभा र संसद मातहतका कुनै पनि समितिमा सहभागी नहुने घोषणा गरेपनि उक्त पार्टीका नेता प्रभु साह पार्टीको निर्णय विपरित उभिएका छन्।
संविधानका विवादित विषयमा अन्तरिम संविधान र विगतको सहमति विपरित बहुमतीय प्रक्रियामा गएको विरोध गर्दै सरकार, सत्तारुढ दल र सभाध्यक्षलाई असहयोग गर्ने पूर्वघोषित कार्यक्रम अनुसार संविधानसभा र संसदीय समितिमा समेत सहभागी नुहने घोषणा एमाओवादी पार्टीले गरेको थियो।
तर बुधबार संसद मातहत अन्तर्राष्ट्रिय सम्बन्ध तथा श्रम समितिका सभापति रहेका साहले पार्टी निर्णय भन्दा बाहिर गएर आफ्नो पदीय जिम्मेवारी बहन गर्दै समितिको बैठक राखेका छन्।
पार्टीको निर्णय विपरित गएको बारे सेतोपाटीको प्रश्नमा उनले पछि कुरा गरौला भन्दै टारेका थिए।
आजै बसेको महिला, बालबालिका, जेष्ठ नागरिक र समाज कल्याण समितिको बैठकमा एमाओवादी सदस्यहरुले आफूहरू पार्टी निर्णय अनुसार बैठकमा सहभागी हुन नसक्ने जानकारी समिति सभापति रञ्जु झालाई दिएर हिडेका थिए।
श्रम समितिको बैठकमा नेपालबाट मलेसिया जाने कामदारको बायोमेटि्रक स्वास्थ्य परिक्षण प्रणालीबारे श्रम राज्य मन्त्री टेकबहादुर गुरुङ, सचिव भोला प्रसाद सिवाकोटी लगायत संबन्धीत सरकारी निकाय र व्यवसायी प्रतिनिधिहरुसँग छलफल भएको थियो।
उक्त बैठकले नेपालको तर्फबाट मलेसिया सरकार समक्ष राखेका सर्तहरु पूरा नगरेको अवस्थामा उक्त प्रणाली तत्काल लागू नगर्न पनि सरकारलाई निर्देशन पनि दिएको छ।