संविधानसभा अध्यक्ष सुवासचन्द्र नेम्वाङले संविधानका विवादित विषयमा प्रश्नावली तयार पार्न प्रस्ताव समिति गठनको प्रस्ताव राखेर संविधान निर्माणको प्रक्रियालाई सुनिश्चितता गरेको भन्दै सत्तारुढ दल लगायत प्रक्रियाको पक्षधर दलले स्वागत गरेका छन्।
आइतबार साँझ बालुवाटारमा बसेको कांग्रेस, एमाले, राप्रपा, नेकपा माले लगायत राप्रपा नेपाल सहित १२ दलका शीर्ष नेताहरुको बैठकले आजको बैठकमा एमाओवादी र मधेसवादी दलको विरोधका बाबजूद पनि प्रस्ताव समिति गठनको प्रस्ताव संविधानसभाले पारित गरेर संविधान बनाउने प्रक्रियालाई सुनिश्चितता दिएको ठहर गरेका छन्।
संविधानसभा निर्वाचन पूर्व र त्यसपछि पनि सबै राजनीतिक दलबाट व्यक्त भएको प्रतिबद्धता बमोजिम माघ ८ भित्र सहमति हुन नसक्दा संविधानसभा नै अबरुद्ध भई उत्पन्न अन्यौलतालाई सभाध्यक्ष नेम्वाङको साझा प्रस्तावले जनतामा संविधान बन्ने सकारात्मक सन्देश दिएको निश्कर्ष दलहरुले गरेका छन, बैठकपछि कांग्रेस सहमहामन्त्री पूर्णबहादुर खड्काले सेतोपाटीलाई बताए।
विवादित विषयमा प्रक्रियाबाट भएपनि अघि बढ्नु पर्ने प्रस्तावमा सहमति जनाउदै आएको राप्रपा नेपाल पनि आजको बैठकमा सहभागी भएको खड्काले बताए।
खड्काका अनुसार, आजको प्रस्ताव पारित गर्न एमाओवादी र मधेसवादी दलका तर्फबाट पनि लोकतान्त्रिक अभ्यासद्धारा विरोध गर्दै सहयोग गरेकोमा धन्यवाद दिएको छ।
साथै आजकेा बैठकले संविधानका विवादित विषयमा प्रक्रिया र सहमतिका लागि तत्काल राजनीतिक संवाद सँगसँगै लैजान वार्ताको प्रारम्भ गर्न प्रधानमन्त्री सुशील कोइरालालाई जिम्मेवारी दिएको छ।
सभाध्यक्षको प्रक्रियाको चर्को विरोध गर्दै सरकारमा आबद्ध दल र सभाध्यक्षसँग वार्तामा तत्काल नबस्ने घोषणा गरेका एमाओवादी र मधेसवादी दलसहितको गठबन्धनमा आबद्ध ३० दलीय मोर्चाले आगामी आन्दोलनको कार्यक्रम तय गन भोलि सोमबार अपरान्ह २ बजे बैठक बस्ने छ।
एमाओवादी र मधेसवादी गठबन्धनको भावी रणनीति र बाहिर आउनसक्ने क्रिया प्रतिक्रियाको अध्ययन गरी भोली अपरान्ह पछि मात्रै प्रक्रियाका पक्षधर दलको आगामी रणनीति तय गर्ने भएका छन्।
त्यसका लागि भोलि अपरान्ह २ बजे सत्तारुढ दल कांग्रेसको संसदीय दलको बैठक बालुवाटारमा बस्ने छ। त्यसपछि अपरान्ह ४ बजे दुई ठूला दल कांग्रेस र एमालेका शीर्ष नेताहरुको बैठक बसेपछि प्रक्रियाको पक्षमा उभिएका १२ राजनीतिक दल र दुई स्वतन्त्र सभासदसहितको संयुक्त बैठक बसी आवश्यक निर्णय गर्ने खड्काले बताए।