नेकपा एमालेका अध्यक्ष केपी ओलीले पाँच दिनका लागि गाउँगाउँ जान आफ्ना सभासद्हरूलाई अह्राएका छन्।
आइतबारको संविधानसभाले प्रश्नावली समितिको प्रस्ताव पारित गरेपछि बसेको एमाले संसदीय दलको बैठकमा अध्यक्षले ओलीले सभासद्हरूलाई भने,‘तपाईँहरू पाँच दिनका लागि गाउँ जानुहोस्, जनताको माझमा हुनुहोस्।’
एकीकृत माओवादी लगायतको मोर्चाले ‘प्रतिकारात्मक’ अभियान चलाउने चेतावनी दिइरहेका बेला ओलीले भने ‘गाउँगाउँमा जानुस् विपक्षीहरूले केही गर्न थाले, उदण्डता मच्चाउन थाले पुलिस, प्रशासन लगाएर उनीहरूलाई थुनाइदिनुस्।’
ओलीले माओवादीको चेतावनीप्रति लक्षित गर्दै आफ्नो पार्टी सकभर प्रतिकारमै नजाने बताए। ‘तर,हामीले प्रतिकार नै गर्न चाह्यौँ भने त्यो उनीहरुका लागि महंगो पर्नेछ, हामी सकभर त्यता जाँदैनौँ।’
उनले संविधानसभा प्रक्रियामा गइसकेको हुनाले अब जसरी भएपनि संविधान बनेरै छोड्ने दावी पनि गरे। एमाले कहिल्यै पनि यताउता ढुलमुल नभएको भन्दै उनले भने ‘एमाले कहिल्यै गड्यौलाको टुप्पा छोएजस्तो यताउता गर्दैन।’
उनले अहिलेको राजनीति ‘बाघले बिरालो जिस्काएको जस्तै’ भएको भन्दै अब प्रक्रियामा गइसकेको हुँदा राजनीति सही दिशामा अघि बढ्ने पनि बताए।
