एमाओवादी सहितको मोर्चाले आइतबारको सभाध्यक्षको निर्णयले आफूहरू संविधान सभा छोडेर नजाने बताएका छन्। मोर्चामा संविधानसभाभित्र १९ र बाहिर ११ गरि ३० दल सामेल छन्।
‘अग्रगामी शक्तिहरु बीचको सहमति बाट अग्रगामी चरित्रको संविधान निर्माण यसै संविधानसभाले जारी गर्ने भन्नेमा हामी दृढ छौँ’ बैठक पछि मोर्चाले जारी गरेकोम विज्ञप्तिमा उल्लेख छ।
मोर्चाले सरकारमा अावद्ध दल र अध्यक्षले सहमतिका लागि अाधार तयार नगरेसम्म वार्तामा नबस्ने र सभाध्यक्षले गर्ने कुनै पनि काम कारबाही र प्रक्रियामा सहभागी नहुने पनि जनाएको छ।
'सभाध्यक्षले आजको कदम नसच्याए र राजनीतिक वातावरण तय नगरेसम्म कुनैपनि वार्तामा नबस्ने र सभाध्यक्षलाई कुनैपनि काममा सहयोग हुने छैन,' मोर्चाका तर्फबाट दाहालले भने। सभाध्यक्षलाई सहयोग नगर्ने भन्दैमा संविधान सभाबाट नभाग्ने उनको दाबी छ।
साथै मोर्चाले सभाध्यक्षले कांग्रेस एमालेको कार्यकर्ता जस्तो व्यवहार गरको आरोप लगाएको छ।
‘सत्ताधारीद्वारा थोपरिएको यो कदमको जति निन्दा गरेपनि कम हुन्छ,’ उसले भनेको छ।
सभामुखको आजको कदम देशलाई प्रतिगमनमा धकेल्ने र द्वन्द्व निम्त्याउने कदम भएकाले यसको प्रतिकात्कात्मक रूपमा आन्दोलन गर्ने मोर्चाका संयोजक एमाओवादी अध्यक्ष प्रचण्डले चेतावनी दिएका छन्।यसले बाह्र बुँदे सम्झौता, शान्ति संझौता, जनयुद्ध, र विभिन्न आन्दोलनको मूल्यमान्यतालाई खिल्ली उडाएको पनि मोर्चाको निष्कर्ष निकालेको छ।
उसले भनेको छ, ‘बाह्रबुँदे पछिका सहयात्रीमा गम्भीर विश्वासको संकट पैदा गरेको यो कदमले संविधानसभाको औचित्यमाथि प्रश्न गर्ने शक्तिलाई बल पुगेको छ।’
बहुमतिय प्रक्रियाले अग्रगामी परिवर्तनका मुख्य विषयमा सहमति कायम गर्न नसक्ने मोर्चाले बताएको छ।
उसले जनतासंग सुझाव माग्न जानेर त्यसपछि प्रतिकार गर्ने निर्णय गरेको छ।
भोलि तीस दलको बैठक बसी आन्दोलनका थप कार्यक्रम सार्वजनिक गर्न आइतबार राजधानीमा आयोजित पत्रकार सम्मेलनमा जानकारी गराइयो।
आज साँझ भने मोर्चाले कालो झण्डा देखाउने र प्रतिकात्मक विरोध गर्ने भएका छन्।
