एमाओवादीका अध्यक्ष पुष्पकमल दाहाल प्रचण्डले एमाले अध्यक्ष केपी शर्मा ओली योे देशको राजा महाराजा वा ठेकेदार नभएको बताएका छन्।
एमाओवादी नेतृत्वमा रहेको १९ दलीय मोर्चाको नेतृत्व गर्दै संविधानसभा अध्यक्ष सुवासचन्द्र नेम्वाङसँग भेटगरी संसद भवनबाट बाहिरिने क्रममा प्रचण्डले ओली विरुद्ध आक्रोस पोख्दै यस्तो भनाई राखेका हुन्।
‘एमाले अध्यक्ष ओली यो देशको ठेकदार पनि होइनन र राजा महाराजा पनि होइनन,’ उनले थप्दै भने, ‘अहिले मिडीयाका साथीहरुपनि ओली जीहरुले जे भन्यो त्यही समाचारलाई प्रचार प्रसार गरीरहेका छन।’
प्रमुख तीन दलका शीर्ष नेताहरुको शनिबार बालुवाटारमा बसेको बैठकमा ओलीले राखेको अभिव्यक्ति प्रति लक्षित गर्दै प्रचण्डले एमाले अध्यक्ष ओलीले आफूलाई राजा महाराजा र अरुलाई रैतीको व्यवहार गरेका आरोप पनि लगाए।
शनिबारको बैठकमा एमाले अध्यक्ष ओलीले एमाओवादी नेताहरुलाई सहमतिको कुरा गर्नु पूर्व संविधानसभाभित्र र बाहिर रहेका विभिन्न नामका मोर्चा विघटन गरी आउन भनेका थिए।
निर्धारित समयमा संविधान निर्माणका लागि सहमति हुन सकेका विषयमा सहमति गर्न र असहमतिका विषयलाई प्रक्रियाबाट टुंगोमा पुग्न एमाओवादी तयार हुनु पर्ने भनाई राखेपछि एमाओवादीले कांग्रेस र एमाले सहमतिको पक्षमा नभएको आरोप लगाउदै बैठकबाट बाहिरिएका थिए।
शनिबारको घटनाबाट रुष्ट बनेको एमाओवादीले आइतबार मधेसवादी दलसहित अन्य साना दलसँग वार्ता गरी संविधानसभा अध्यक्षलाई भेट गरेका थिए।
नेम्वाङसँगको भेटमा आफूहरुले निर्धारित मितिभित्र संविधान निर्माण गर्न प्रमुख दलहरुबीच सहमति अनिवार्य भएको भनाई राखेका थिए।
संविधानसभा व्यवस्थापिका संसद नभएको भन्दै आफूहरुले बहुमतको आडमा दुई दलले पेलेरै प्रक्रियाबाट संविधान बनाउन खोजे आफूहरुले जस्तोसुकै प्रतिकार गर्न बाध्य हुने जानकारी अध्यक्ष नेम्वाङलाई दिएको प्रचण्डले बताए।
आइतबार आफ्नो विचारसँग सहमत हुने संविधानसभामा रहेका मधेसवादी र अन्य जातिय पहिचान पक्षधर साना दलको सम्मिलित १९ दलीय मोर्चाको बैठक बसी सत्तारुढ दल बिरुद्ध दबाब दिन सडक आन्दोलनको तयारी थाल्ने निर्णय गरेका थिए।
मोर्चाको भावी रणनीति तय गर्न एमाओवादी महासचिव कृष्णबहादुर महराको संयोजकत्वमा ११ सदस्यीय कार्यदल गठन गरेको छ।