गृहमन्त्री वामदेव गौतमका सल्लाहकार एमाले नेता प्रदिप नेपालले 'दिक्क' भएर सल्लाहकार पदवाट राजिनामा दिएका छन्।
सेतोपाटीसँग कुरा गर्दै नेपालले भने, " नेपाल सरकारका सल्लाहकारको कुनै भूमिका हुँदो रहेनछ। गाडी र सुबिधा लिने बाहेक कुनै भूमिका नहुने भएपछि मैले दिक्क भएर पद छोडेको हुँ।'
आफू जीवनमा सक्रिय मानिस भएको र कुनै भूमिका बिना मन्त्रालयमा बसिरहन नसकेर छोडेको उनले बताए। "सल्लाहकरको काम त साथीहरु आउँदा चिया खुवाउने, गफ गरेर बस्ने मात्रै भयो,' उनले भने, 'अर्कोतिर वामदेब कमरेडसहित म पनि मन्त्रालयमा भएपछि साथीहरुको मन्त्रालयको काम प्रति चासो बढ्यो। उहाहरुले मन्त्रालय झन् प्रभाकारी होला भन्ने अपेक्षा गर्नुभयो।'
आफूले भूमिका नपाउनुमा उनले गृहमन्त्री गौतमलाई भने दोष दिएनन्। "उँहाले म अन्तिम पटक गृहमन्त्री हुँदै छु, राम्रो काम गर्न चाहन्छु सघाउनु पर्यो भन्नु भयो। म आँए," उनले भने, " गृहमन्त्रालयको कर्मचारीतन्त्रले काम गर्न दिएन।"
उनले गृहमन्त्रीले आफूलाई पनि काम दिन नसकेको, कर्मचारीतन्त्रलाई पनि सम्झाउन असफल भएको बताए। "गृह प्रशासनले मेरो कुरा 'इन्डोर्स' नै गरेन। गृहमन्त्री दुईतिरको चेपुवामा परे जस्तो भयो अनि मैले छोडीदिए," उनले भने।
गृहमन्त्रीले चाहेको भए तपाईलाई भूमिका दिन नसक्ने त होईन नि भन्ने प्रश्नमा नेपालले भने, "यथार्थ त्यस्तो होइन " उनले भने "म प्रविधि मैत्री मान्छे, प्रविधिका हिसाबले केहि सुधार गरौँ भन्ने लागेको थियो। गृहमन्त्रीले पनि हुन्छ भन्नु भयो। म महिनौ कुरे, केहि भएन छोडिदिए।"
आफ्नो राजिनामालाई सामान्य भन्दै नेपालले भने, "अस्ति म सल्लाहकारमा जाँदा पनि केहि मानिस किन गइस भन्दै थिए, आज छोडदा फेरि किन छोडिस भन्दै छन्। तर, म सल्लाहकारमा नियुक्त हुनु र छोड्नु दुवै सामान्य कुरा हो।"
