मोहन वैद्य नेतृत्वको नेकपा-माओबादीले 'लोभ-लालच' र 'जबर्जस्ती धर्म परिवर्तन' विरुद्ध संविधानमै व्यवस्था हुनुपर्ने माग गरेको छl पार्टीले हालै मात्र 'जन-संविधानसम्बन्धि आधारभूत अवधारणा' जारी गर्दै यस्तो माग गरेको होl
केही दिनअघि सार्वजनिक गरेको उक्त अवधारणा पत्रमार्फत पार्टीले कुनै पनि धार्मिक 'उत्पीडन, अतिक्रमण र जवर्जस्ती धर्म परिवर्तन' लाई वर्जित गर्नुपर्ने माग राखेको छl
पार्टीले 'मार्क्सवादी दर्शनअनुसार' सबैलाई समान रुपले धर्म मान्ने अधिकार रहेको तर, जबर्जस्ती वा लोभमा परेर हुने धर्म परिवर्तनले समाजमा विग्रह ल्याउने बताएको छl 'राज्यको कुनै जात वा धर्म हुँदैनl यो धर्म निरपेक्ष हुन्छ,'नेकपा-माओवादी पार्टी प्रवक्ता पम्फा भुसालले भनिन् 'तर, अहिलेको अवस्थाले सम्बोधन गर्न यस्तो संवैधानिक व्यवस्था जरुरी भएको छl'
माओवादी पार्टीले सार्वजनिक गरेको अवधारणाको १५ औं वुँदामा सबै जनतालाई धार्मिक स्वतन्त्रता प्रदान गरिने उल्लेख गर्दै पार्टीले 'कुनै पनि प्रकारको धार्मिक उत्पीडन, अतिक्रमण र जवर्जस्ती धर्म परिवर्तन गर्न दिइने छैन' भन्ने उल्लेख छl
संवैधानिक रुपमै यस्तो व्यवस्था नगरे नेपालमा धार्मिक अतिवाद फैलदै यसले 'साम्प्रदायिक समस्याको' रुप लिने भुषालको तर्क छl भुसालले भनिन् 'तपाईं अहिले नै राम्ररी हेर्नुस्, यसले अहिले कस्तो रुप लिंदैछ भनेर थाहा हुन्छl'
भुषालले माओवादी जनयुद्धकालमा हिन्दु धर्म बिरोधी कुनै पनि क्रियाकलाप आफ्नो पार्टीको आधिकारिक नीति नभएको बताईनl उनले भनिन् 'हामीले हिन्दु धर्मको बिरोध गरेका छैनौंI'
