अमेरिकी राष्ट्रपति बाराक ओबामाले छिमेकी मुलुक क्युवासँग कुटनीतिक सम्बन्ध पूर्नस्थापित गर्ने घोषणा गरेका छन। बुधवार टेलिभिजन सम्बोधनमार्फत ओबामाले ५ दशकदेखि क्युवामाथि लागेको ब्यापार नाकाबन्दी पनि फुकुवा गरिने बताएका छन्।
सम्बोधनमा ओबामाले 'दशकौं पुरानो र काम नलाग्ने नीतिलाई अन्त्य गर्दै आफ्ना चासोहरुलाई प्रर्वद्धन गर्न दुवै छिमेकी मुलुकले सम्बन्ध सामान्यीकरण गर्ने नीति अंगिकार गरिएको' बताए। उनले अहिलेको पुस्ता नजन्मिदै अबलम्बन गरिएको नीतिमा यो निर्णयले नयाँ आयाम दिने उल्लेख गरे।
क्युवाका राष्ट्रपति राहुल क्यास्ट्रोले पनि राष्ट्रिय टेलिभिजनबाट सम्बोधन गर्दै ओबामासँग टेलिफोनमा वार्ता भएको जानकारी दिए। 'दुवै मुलुकको हितका खातिर नयाँ बाटो बनाउन सफल भएको' उल्लेख गर्दै क्यास्ट्रोले 'ओबामाको निर्णयले क्युवाका जनताको सम्मान भएको' बताए। कुटनीतिक सम्बन्धको पुर्नस्थापनाले मात्रै सबै समस्याको समाधान नहुने तर नाकाबन्दी फुकुवाले देशको अर्थतन्त्रमा गहिरो असर पार्ने क्यास्ट्रोले सम्बोधनमा उल्लेख गरे।
सबैलाई आश्चार्यमा पार्ने गरी ओबामाले गरेको यो निर्णय हुन १८ महिनासम्म वार्ता भएको न्युयोर्क टाइम्सले जनाएको छ। वार्ताको मध्यस्तता पोप फ्रान्सिसले गरेका थिए। ओबामाको घोषणासँग ९० माइलको दुरीमा रहेका यी दुई अमेरिकी मुलुकको तिक्तता सकिन लागेको छ।
सन् १९५९ को आन्दोलन पछि क्युवामा फिड्रोल क्यास्ट्रो शासनमा आएका थिए। साम्यवादी मुलुक क्युवासँग अमेरिकाले १९६१ को जनवरीमा कुटनीतिक सम्बन्ध तोडेको थियो। सन् १९९०को दशकमा सोभियत युनियनको विघटनसँगै धेरै कम्युनिष्ट मुलुकसँग कुटनीतिक सम्बन्ध कायम गरेको अमेरिकाको छिमेकी क्युवासँग भने तिक्ततापूर्ण सम्बन्ध थियो।
प्रकाशित मिति: 2014-12-18 13:29:11
