प्रहरीलाई सूचना दिने एक व्यक्तिलाई आठ वर्ष अगाडि गोली हानी हत्या गरेको आरोपमा बङ्गलादेशको एक अदालतले बुधबार दुई इस्लामी लडाकूलाई मृत्युदण्ड दिन आदेश दिएको छ।
आफ्नो २० वर्षमाथिको उमेर समूहमा रहेका यी दुबै व्यक्तिलाई यसअघि उक्त अपराधका लागि दोषी ठहर गरिएको थियो । उनीहरू प्रतिबन्धित जमाएतुल मुजाहिदिन बङ्गलादेश (जेएमबी) नाम गरेको लडाकू समूहको सदस्य भएको सरकारी अधिवक्ता तसलिमा यासमिनले बताए।
मृत्युदण्ड पाएका एक व्यक्तिले आफूलाई दिइएको दण्ड कडा भएको र गोली प्रहारको समय २००६ मा आफू नाबालिग भएको भनी चिच्याएका थिए।
यासमिनले यी दुई व्यक्ति सरकारको काममा वाधा हालेको र प्रहरीसूत्रलाई सन् २००६ को डिसेम्बर २९ मा गोली प्रहार गरेको अपराधमा दोषी प्रमाणित भएको बताए। उनले उक्त स्रोतको पछि अस्पतालमा मृत्युभएको जानकारी दिए। उनले यी दुबै व्यक्तिलाई झुण्ड्याएर मृत्युदण्ड दिन आदेश प्राप्त भएको बताए।
यी दुई व्यक्तिमध्ये एक घटनाको समयमा १४ वर्षका थिए र प्रहरी सूत्रले उनीहरूलाई तङ्गैल जिल्लामा रोक्न खोज्दा निजले उक्त सूत्रमाथि गोली प्रहार गरेका थिए । प्रहरीसूत्रले उनीहरूसँग विस्फोटक पदार्थ भएको आशङ्का गरेका थिए ।
जेएमबीले अनेकौँ आत्मघाती विस्फोट तथा मुलुकभर करिब ४०० वटा साना बम एकैपटक विस्फोट गराएको भनी यस समूहलाई सन् २००५ मा प्रतिबन्ध लगाइएको थियो ।
उक्त बम विस्फोटका कारण कूल २८ व्यक्तिको मृत्यु भएको थियो र त्यसमा धर्मनिरपेक्ष कार्यकर्ता तथा दुई न्यायाधीश पनि परेका थिए ।
उक्त आक्रमणले आधुनिक मुसलमान बहुसङ्ख्यक जनसङ्ख्या बसोबास गर्ने मुलुकमा इस्लामी लडाकूपना बढेको आशङ्का गराएको थियो ।
यसपछि सरकारले तत्कालै लडाकू समूहलाई नियन्त्रण गरेको थियो र जेएमबीका हजारौँ सदस्यलाई पक्राउ गरिएको थियो । सन् २००७ मा यसका छ प्रमुख नेताहरूलाई मृत्युदण्ड दिइएको थियो ।
हाल विभिन्न नामका लडाकू समूहका करिब १०० सदस्यलाई मृत्युदण्ड दिइएको छ र उनीहरूले उच्च अदालतमा पुनरावेदन दिएका छन् ।
प्रतिरक्षाका वकिल फारुक अहमदले मृत्युदण्ड दिइएका दुईमध्ये एक घटनाका समयमा नाबालिग भएको आधारमा पुनरावेदन दिइने बताए। रासस/एएफपी
