अफगानिस्तानका राष्ट्रपति असरफ घानी र एनेकपा माओवादीका वरिष्ठ नेता तथा संवैधानिक–राजनीतिक संवाद तथा सहमति समितिका सभापति डा. बाबुराम भट्टराईबीच भेटवार्ता भएको छ । सोल्टी क्राउन प्लाजामा भएको मैत्रीपूर्ण भेटवार्तामा उनीहरुबीच आर्थिक विकास र राजनीतिक संक्रमणका विषयमा कुराकानी भएको छ ।
‘खासगरी अफगानिस्तान पनि अशान्तिबाट संक्रमणको प्रक्रियामा गुज्रिराखेको छ र नेपाल पनि द्वन्द्वोत्तरकालबाट गुज्रिरहेको छ । दुईटै देशका समस्या समान भएको हुनाले र उनले पनि विषयबस्तुलाई अलिकति अर्थ–राजनीतिक र भू–राजनीतिक कोणबाट हेर्ने र मेरो आफ्नो रुची र सोंच पनि अर्थ–राजनीतिक, भू–राजनीतिक ढंगबाटै नेपालको समस्या बुझ्ने भएको हुनाले हामीले अलि खुल्ला हृदयले नै विचारको आदानप्रदान गर्यौं’, सभापति भट्टराईले भेटको विषयबस्तुका बारेमा भने।
घानीले आफ्नो २० औं नेपाल भ्रमण भएको बताएको उल्लेख गर्दै सभापति भट्टराईले भने– ‘उहाँ यहाँको समस्या, यहाँका पार्टी र नेताहरुका प्रवृत्तिका बारेमा राम्रै जानकारी राख्नुहुँदो रहेछ । त्यसैले हामीले खुलेर नै दुबै देशका समस्याबारे कुराकानी गर्यौं । खासगरी उहाँले हालसालैको अफगानिस्तानको चुनावका आफ्नै निकटतम प्रतिद्वन्द्वीसँग पनि सहमति बनाएर जुन संयुक्त राष्ट्रिय सरकार बनाउनुभयो त्यसबारे उहाँसँग मैले कसरी गर्नुभयो भनेर बढि जिज्ञासा राखें । त्यस विषयमा उहाँसँग निजीरुपमा कुराकानी भयो।’
उनीहरुबीचको कुराकानीमा हाम्रोजस्तो संक्रमणकालबाट गुज्रेको देशले कमसेकम १०/२० वर्ष संयुक्त राष्ट्रिय सरकार बनाएरै जानुपर्ने, त्यसरी मात्रै शान्ति, स्थायित्व कायम गदै देशलाई समृद्धिको दिशातिर लैजान सकिने समान सोंच व्यक्त भएको थियो ।
‘अफगानिस्तान र नेपाल दुबै देश जुन भू–राजनीतिक संवेदनशील ठाउँमा छन् त्यस्ता देशहरुले चाहीँ सबैसँग सन्तुलन मिलाएर अघि बढ्ने राष्ट्रिय सहमति निर्माणमा अघि बढ्नुपर्छ भन्ने समान खालको कुराकानी भयो’, भट्टराईले भने– ‘उनले पाहुनाको रुपमा अफगानिस्तान आएर विचारको आदानप्रदान गर्न पनि आग्रह गरे र मैले अनुकुल समयमा संविधान बनिसकेपछि आउँछु भनेको छु ।’
घानी विश्व बैंकको कन्सल्टेन्टको रुपमा नेपाल आउँदा, भट्टराई अर्थमन्त्री हुँदा पनि घानीसँग भेटवार्ता भएका थिए । उनीहरुबीच धेरै पटक भेटवार्ता भइसकेको र आर्थिक विकाससँग समान रुची र ज्ञान भएकाले पनि मित्रवत सम्बन्ध रहेको भट्टराईले बताए।
