राष्ट्रिय मानव अधिकार आयोगका अध्यक्ष अनुपराज शर्माले महिलाविरुद्ध हुने हिंसा रोक्ने काम घरबाटै शुरु गर्नुपर्ने आवश्यकता औंल्याएका छन्।
महिला हिंसाविरुद्धको १६ दिने अभियानको सन्दर्भमा आयोगमा मङ्गलबार आयोजित कार्यक्रममा बोल्दै अध्यक्ष शर्माले पहिले घरपरिवार नै हिंसा मुक्त हुनुपर्ने बताएका हुृन्।
उनले महिला हिंसाविरुद्धको अभियानलाई घरबाट अघि बढाएर जनस्तरको व्यापक घेरासम्म पुर्याउन शसक्तिकरण गर्न समाजका प्रत्येक सदस्यले महिला हिंसा रोक्ने प्रतिबद्धता जाहेर गर्ने गरेमा अभियानले मूर्त रूप पाउने धारणा राखे।
सो अवसरमा आयोगका सदस्य मोहना अन्सारीले महिलामाथि हुने हिंसा अन्त्य गर्न समाजका प्रत्येक सदस्यको सजग र सतत् प्रयत्न आवश्यक रहेको बताइन्। उहाँले सबैमा महिला हिंसा अन्त्य गर्ने प्रतिबद्धता र आत्मबल हुनुपर्नेमा जोड दिइन्।
कार्यक्रममा आयोगका सदस्य प्रकाश वस्ती र गोविन्द शर्मा पौड्याल उपस्थित थिए।
