भारतीय प्रधानमन्त्री नरेन्द्र मोदीले नेपालसँगको सम्बन्ध समिक्षा गर्ने बताएका छन्।
बुधबारदेखि शुरु हुने सार्कको १८औं शिखर सम्मेलनमा भाग लिन मंगलबार नयाँदिल्लीबाट हिड्नु पूर्व जारी गरेको
विज्ञप्तिमा भारतीय प्रधानमन्त्रीले नेपालसँग रहीआएकेा विशिष्ट सम्बन्धका कारण आफूले चार महिनाको अन्तरमा दोस्रो पटक काठमाडौं भ्रमणमा जान लागेकेा पनि बताएका छन्।
उनले साउनमा गरेको पहिलो नेपाल भ्रमणका बेला गरिएका दुइपक्षीय समझदारी तथा निर्णयले व्यवहारमा उल्लेख्य प्रगति गरेको दाबी गर्दै भनेका छन्, म प्रधानमन्त्री सुशील कोइराला र अरु नेपाली नेताहरुसँग हाम्रो सम्बन्धको समिक्षा गर्नका लागि तयार छु।
मोदीले केही ठोस सझौता र आपसी सम्पर्क तथा विकासका समझदारी तय हुनेमा आफू आशावादी रहेको पनि बताएका छन्।
छिमेकी राष्ट्रहरुसँग निकटवर्ती सम्बन्ध विकास गर्ने भारत सरकारको प्राथमिकता रहेको उल्लेख गर्दै भारतीय प्रधानमन्त्रीले क्षेत्रीय तहमा सामाजिक, आर्थिक विकासका अतिरिक्त एकिकृत दक्षिण एशियाको समझदारीमा अघि बढ्न दुइपक्षिय, क्षेत्रीय वा उपक्षेत्रीय पहल आवश्यक रहेको बताएका छन्। सार्क शिखर सम्मेलनका अवसरमा आफूले दक्षिण एशियाली सरकार प्रमुख तथा समकक्षीसँग दुईपक्षिय भेटवाता गर्ने पनि जनाएका छन्।
प्रधानमन्त्री मोदीले समकक्षी तथा सरकार प्रमुखसँग भेटवार्ता गर्ने बताए पनि पाकिस्तानका प्रधानमन्त्री नवाज सरिफसँगको दुईपक्षिय वार्ताबारे कुनै उल्लेख गरेका छैनन्।