भारत सरकारले नेपाली सेनालाई दिएको अत्याधुनिक हेलिकोप्टर भारतीय प्रधानमन्त्री नरेन्द्र मोदीले हस्तान्तरण गरेका छन्।
भारतीय प्रधानमन्त्री नरेन्द्र मोदीले अपराह्न सैनिक मञ्च टुँडिखेलमा आयोजित विशेष समारोहमा उक्त हेलिकोप्टर नेपाली सेनालाई हस्तान्तरण गरेका हुन्। दुई देशबीचको सहयोग आदानप्रदान गर्ने सन्दर्भमा भारत सरकारबाट नेपाली सेनालाई उक्त हेलिकोप्टर सहयोगस्वरुप उपलब्ध गराउन लागेको हो।
मोदी काठमाडौं आइपुगेकै दिन मंगलबार नेपाली सेनाले सैनिक मञ्च टुँडिखेलमा आयोजना गर्ने एक समारोहबीच हेलिकप्टर नेपाली सेनालाई हस्तान्तरण गरेका हुन्।
कुल १४ सिट क्षमताको उक्त हेलिकोप्टरले मुलुकका पहाडी तथा हिमाली जिल्लामा समेत सहजै रूपमा उडान भर्न सक्ने नेपाली सेनाका प्रवक्ता जगदीशचन्द्र पोखरेलले जानकारी दिए। भारतीय सेना र नेपाली सेनाबीच लामो समयदेखि अत्यन्तै मित्रवत् सम्बन्ध रहँदै आएको छ। नेपाली सेनाका प्रधानसेनापति र भारतीय सेनाध्यक्षलाई एकअर्का मुलुकले मानार्थ महारथीको दर्जा प्रदान गर्ने विशिष्ट परम्परा रहँदै आएको छ।
विगतमा नेपाल र भारतबीच भएका सहमति अनुसार उक्त हेलिकप्टर नेपाललाई सहयोग स्वरुप उपलब्ध गराउन लागिएको हो हिन्दुस्तान एरोनोटिक्स लिमिटेडले निर्माण गरेको उक्त हेलिकप्टर हस्तान्तरण समारोहमा राखिने छ। सन् २०१२ मा निर्माणपछि ग्राउन्ड टेस्ट गरिएको सो हेलिकोप्टर आक्रमणको उद्देश्यका लागि भारतीय सेनाले प्रयोग गर्दै आएको छ। हेलिकोप्टरमा टुर्रेट गन, रकेट, एयर टु एयर मिसाइल्स तथा एयर टू ग्राउन्ड मिसाइलको फिचर समेत रहेको छ।