मोहन बैद्य नेतृत्वको नेकपा माओवादीका सचिब नेत्रविक्रम चन्द विप्लवले औपचारिक रुपमै पार्टीबाट अलग भएको घोषणा गरेका छन्।
सोमवार विज्ञप्ती जारी गर्दै विप्लवले भनेका छन् 'क. किरणको नेतृत्वमा पार्टी अगाडि बढ्न नसक्ने र वर्ग संघर्षको नेतृत्व गर्न नसक्ने निष्कर्षसहित आजका मितिदेखि क.किरणको नेतृत्वसँग सम्बन्ध विच्छेद गरेको जानकारी गराउँदछौँ।'
उनले अब चाँडै नै भावी रणनीतिका बारेमा छलफल गरेर अगाडि बढ्ने पनि विज्ञप्तीमा उल्लेख गरेका छन्।
हेर्नुहोस् विप्लवले निकालेको विज्ञप्तीको पूर्ण पाठ :
हाम्रो पार्टी नेकपा–माओवादीमा लामो समयदेखि वैचारिक बहस चल्दै आएको सर्वविदितै छ । मुख्यतः नेपाली क्रान्तिलाई कसरी अगाडि बढाउने र पार्टीलाई सर्वहारा वर्गको अग्रदस्ता कसरी बनाउने भन्ने विषयमा हाम्रो बहस चल्दै आएको हो।
यस विषयमा पार्टीभित्र गम्भीर मतान्तर देखा परे । पदाधिकारी र पोलिट ब्यूरोको बैठकबाट ती विषय हल नभएपछि गत असारमा राष्ट्रिय सम्मेलन गरी ठोस निष्कर्ष निकाल्ने निर्णय पार्टीमा भएको थियो । सो क्रममा राष्ट्रिय सम्मेलनका लागि फरक दस्तावेजहरु समेत तयार भएका थिए ।
जब दस्तावेजहरु तयार भए, तब पार्टी मूल नेतृत्वबाट आश्चर्यजनक रुपमा सम्मेलनलाई रोक्ने प्रस्ताव आयो । त्यसपछि पार्टीमा झन् अन्यौलता र अकर्मन्यता बढ्दै गयो ।
पार्टीको गत्यावरोध तोड्नका लागि अन्तिम प्रयत्न स्वरुप हामी ७ मंसिर २०७१ को केन्द्रीय समितिको पूर्ण बैठकमा सहभागी भएका थियौं । तर, किरण लगायतका कमरेडहरुको भूमिकाले पार्टीको गत्यावरोध झन् बढ्ने स्पष्ट देखियो ।
यसरी लामो समयदेखि कायम रहेको गत्यावरोध तोड्न नसक्ने र अन्यौलता बढ्दै जाने स्पष्ट भयो । क। किरणको नेतृत्वमा पार्टी अगाडि बढ्न नसक्ने र वर्ग सङ्घर्षको नेतृत्व गर्न नसक्ने निष्कर्षसहित आजका मितिदेखि क। किरणको नेतृत्वसँग सम्बन्ध विच्छेद गरेको जानकारी गराउँदछौं । साथै हाम्रो भावी रणनीतिका बारेमा छिट्टै व्यवस्थित छलफल गरेर सार्वजनिक गर्ने निर्णय पनि लिइएको छ ।
क्रान्तिकारी अभिवादन सहित १
'''''
विप्लव
सचिव
नेकपा–माओवादी