भारतीय प्रधानमन्त्री नरेन्द्र मोदीको काठमाडौं बाहिर हुने भनिएका सबै कार्यक्रम स्थगन भएको नेपालको परराष्ट्र मन्त्रालयले आधिकारिक जानकारी दिएको छ। आइतबार बिहानै भारतीय विदेश मन्त्रालयले नयाँदिल्लीमा पत्रकार सम्मेलन गरी प्रधानमन्त्री मोदीको काठमाडौं बाहिरका सबै भम्रण रद्ध भएको जानकारी दिएको थियो।
परराष्ट्र मन्त्रालयका प्रमुख शिष्टाचार महापाल कालिप्रसाद पोखरेलले भारतीय प्रधानमन्त्री नरेन्द्र मोदीका काठमाडौं बाहिरका प्रस्तावित भ्रमणका कार्यक्रमहरु सबै रद्ध भएको बताए। 'सार्कका बेला प्रधानमन्त्री नरेन्द्र मोदी काठमाडौंमा व्यस्त रहनु पर्ने भारतीय पक्षबाट जनाउ आएको छ' उनले सेतोपाटीसँग भने,'यो जनाउसँगै प्रधानमन्त्री मोदीको काठमाडौंबाहिरका सबै भ्रमण रद्ध भएका छन्। अब उहाँ सार्कका लागि मात्र काठमाडौं आउनु हुनेछ।'
