दक्षिण एसियाली क्षेत्रीय सहयोग संगठन (सार्क) शिखर सम्मेलन आयोजना गरेको १३ वर्षपछि काठमाडौं पुन अर्को सार्क महामेलामा जुटेको छ। जसको अन्तिम तयारी पूरा भइसकेको परराष्ट्र मन्त्रालयले जनाएको छ।
परराष्ट्र मन्त्रालयका अनुसार बुधबारबाट औपचारिक रुपमा सुरु हुने सार्क महामेलाको अन्तिम तयारी प्रदर्शन 'ग्राय्ण्ड रिहर्सल' सोमबार बिहान आयोजना गरिँदै छ। सोमबार बिहान ७ बजेदेखि आयोजना गरिने ग्राय्ण्ड रिहर्सलमा नेपाल सरकारका तर्फबाट उपप्रधानमन्त्रीद्वय वामदेव गौतम र प्रकाशमान सिंह सहभागी हुने कार्यक्रम तय भएको छ।
रिहर्सलमा विशेष गरी सार्क राष्ट्रका सरकार प्रमुख तथा राष्ट्र प्रमुखहरुको सुरक्षा, स्वागत, सवारी सञ्चालन कसरी गर्ने भन्ने पूर्वअभ्यास हुनेछ। त्यसमा मुख्यतया राष्ट्रप्रमुख तथा सरकार प्रमुखहरुको स्वागत र सवारीमा 'प्रोटोकल' कसरी मिलाउने भन्ने नै यो रिहर्लसलको मुख्य उद्धेश्य हो।
ग्राय्ण्ड रिहर्सल भीभीआईपीको विशेष विमान आईपुग्नेस्थल त्रिभुवन विमानस्थलको अति विशिष्ट कक्षदेखि भीभीआईपीहरु बस्ने होटल सोल्टीसम्म अन्तिम अभ्यास गरिनेछ। साथै सार्क शिखर सम्मेलनस्थल राष्ट्रिय सभा गृहसम्म यो ग्राय्ण्ड रिहर्सल चल्ने छ।
यस पटकको सार्क शिखर सम्मेलनमा सहभागी हुन काठमाडौं आउने राष्ट्रपतिहरुको स्वागत गर्न नेपालका राष्ट्रपति डा. रामबरण यादव विमानस्थलसम्म नजाने भएका छन्। त्यस्तै पूरानो परम्परा तोड्दै सार्क राष्ट्रका प्रधानमन्त्रीहरुको स्वागतका लागि प्रधानमन्त्री सुशील कोइरालासमेत विमानस्थल नजाने भएका छन्।
त्रिभुवन अन्तराष्ट्रिय विमानस्थल, गौचरस्थित अतिविशिष्ट कक्षमा सार्क राष्ट्रका सरकार तथा राष्ट्रप्रमुखहरु आइपुग्दा उनीहरुलाई नेपालको तर्फबाट उपप्रधानमन्त्री द्वय वामदेव गौतम र प्रकाशमान सिंहले पालैपालो स्वागत गर्ने कार्यक्रम बनेको छ।
सार्कका अतिविशिष्ट पाहुना काठमाडौं विमानस्थलको अतिविशिष्ट कक्षमा आइपुग्दा नेपालका उपप्रधानमन्त्रीले प्रधान सेनापति गौरव शम्शेर जबरालाई परिचय गराउने कार्यक्रमसमेत तय भएको छ।
त्यस्तै नेपाल सरकारका मन्त्रीहरु, मुख्य सचिव लिलामणि पौड्याल, प्रधानमन्त्रीका प्रमुख निजी सचिव वसन्तकुमार गौतम सार्क राष्ट्रका राष्ट्रप्रमुख तथा सरकार प्रमुखहरुको स्वागतमा विमानस्थलसम्म पुग्ने छन्। त्यसबाहेक सार्क राष्ट्र अफगानिस्तान, माल्दिभ्स र श्रीलंकाका राष्ट्रपतिहरुको स्वागतका लागि भने नेपालका राष्ट्रपतिका तर्फबाट सचिव अनुपकुमार उपाध्याय विमानस्थल जाने भएका छन्।
यसअघि सार्कका अति विशिष्ट पाहुनालाई स्वागत गर्न सबैभन्दा पहिले विमानस्थलमा जहाजमै गएर स्वागत गर्ने काम भने परराष्ट्र मन्त्रालयका प्रमुख शिष्टाचार महापाल कालीप्रसाद पोखरेलले गर्ने भएका छन्।
सार्क शिखर सम्मेलनमा सहभागी हुन सार्कका विशिष्ट पाहुनाहरु सोमबारबाट राजधानी आउने क्रम सुरु हुने भएकाले मंसिर ८ गते सोमबारदेखि १२ गतेसम्म त्रिभुवन अन्तराष्ट्रिय विमानस्थल २४ सै घण्टा खुल्ने भएको छ।
त्यसका लागि सुरक्षा प्रबन्ध, अध्यागमन, हवाई तथा एयरपोर्ट प्रणालीका कर्मचारीहरुलाई ८–८ घण्टाका हिसावले विशेष डयुटी खटाइएको छ। साथै एयरपोर्टमा परराष्ट्र मन्त्रालयको विशेष डेक्स समेत स्थापना गरिएको छ। साथै विमानस्थलको सुरक्षा पहिलेको तुलनामा अत्यन्तै कडा पारिएको छ। सर्बसाधारण प्रवेशमा पूरा रोक लगाइएको छ।
सार्क राष्ट्रका विदेश मन्त्रीहरु सोमबार आइसक्ने
सोमबार दिनभर सार्क राष्ट्रका सबै परराष्ट्र मन्त्रीहरु काठमाडौं आइसक्ने पनि प्रमुख शिष्टाचार महापाल कालीप्रसाद पोखरेलले सेतोपाटीलाई जानकारी दिए। 'सार्क शिखर सम्मेलनमा सहभागी हुन सोमबार दिनभर सबै सार्क राष्ट्रका विदेश मन्त्रीहरु काठमाडौं आइपुग्नु हुनेछ' पोखरेलले भने–'तर श्रीलंकन परराष्ट्र मन्त्री भने मंगलबार मात्र आइपुग्ने कार्यक्रम छ।'
प्राप्त जानकारी अनुसार श्रीलंकाका विदेशमन्त्री मंगलबार बिहान साँढे ९ वजे विशेष विमानबाट राष्ट्रपति महेन्दा राजापाक्षसँगै काठमाडौं आउने भएका छन्।
सार्कको शिखर सम्मेलन आयोजना हुनुअघि आइतबारबाट सुरु भएको सार्कका परराष्ट्र सचिव स्तरीय बैठकमा सहभागी हुन अफगानिस्तानबाहेक सबै देशका सचिवहरु काठमाडौं आइसकेका छन्।
