हिजो तीन दल र सभामुख बीच भएको सहमतिको विरोधमा एमाओवादी नेतृत्वमा संविधान सभामा रहेका २० दलीय मोर्चा उत्रिएपछि आजका लागि तय समितिको बैठक स्थगित भएको छ।
बैठकले विगतमा समितिको प्रवतिवेदन पठाउँदा जस्तै गरी यो पटक पनि प्रतिवेदन पठाउनु पर्ने माग गरेपछि मोर्चाका सदस्यहरू बैठकमा उपस्थित नहुँदै समितिका सचिव मुकुन्द शर्मा मार्फत बैठक हलमा जानकारी गराएका थिए।
यसअघि प्रधानमन्त्री निवास बालुवाटारमा शनिबार बसेको प्रमुख तीन दलका शीर्ष नेताहरु, संविधानसभाका अध्यक्ष र संवाद समितिका सभापतिबीच भएको छलफलमा संवाद समितिले संविधानसभामा पठाउने प्रतिवेदनका विषयमा छलफल भएको थियो।
साँझ ६:०० बजेदेखि बसेको बैठक करिब २ घण्टा चलेको थियो। दलहरुबीचको छलफलपछि संवाद समितिका सभापति डा. बाबुराम भट्टराईले आज बिहान १०:०० बजेका लागि संवाद समितिको बैठक बोलाएका हुन्। आज बस्ने संवाद समितिको बैठकबाटनै प्रतिवेदन पठाउनेबारेमा निर्णय गर्ने गरी शीर्ष बैठक सकिएको थियो।
बैठकमा प्रमुख तीन दलका शीर्ष नेताहरु प्रधानमन्त्री तथा कांग्रेस सभापति सुशील कोइराला, एमाले अध्यक्ष केपी ओली, एमाओवादी अध्यक्ष पुष्पकमल दाहाल ‘प्रचण्ड’, संविधानसभाका अध्यक्ष सुवासचन्द्र नेम्वाङ र संवाद समितिका सभापति भट्टराई सहभागी थिए।