पूर्वी अफ्रिकी राष्ट्र सोमालियामा आधारित मुस्लिम अतिवादीहरुको संगठन अल सबाबले छिमेकी राज्य केन्याको उत्तरी क्षेत्रको बसमा यात्रा गरिरहेका गैर मुस्लिम यात्रुहरुलाई छानी छानी गोली ठोकेर हत्या गरेका छन्। केन्याको राजधानी नाइरोबी तर्फ गैरहेको उक्त बसलाई आतंककारीहरुले मनडेरा भनिने ठाउँमा रोकेर यात्रुहरुको हत्या गरेको बीबीसीले जनाएको छ।
समाचार अनुसार उनीहरुले सोमालियनहरुलाई छुट्ट्याएर साठीजना यात्रु मध्ये कुरानका हरफहरु पढन नजान्ने जती सबैलाई कन्चटमा गोली प्रहार गरेर क्रुर हत्या गरेका थिए। उनीहरुले यसो नगर्नु भनेर हार गुहार गर्न खोज्ने सोमालियनलाई पनि मारेका थिए।
घटना भए लगत्तै उक्त संगठनले उक्त घटनामा आफ्नो संलग्नता भएको जनाएको थियो। उसले निर्दोष यात्रुहरुलाई मारेर केन्याका सैनिकहरुको आफूहरु बिरुद्दको आक्रमणको जवाफी कारबाही भएको जनाएको छ। यसैबीच केन्याका अधिकारीहरुले आक्रमणकारीको शिविर ध्वस्त पारिदिएको दाबी गरेका छन्।
बिभिन्न आतंककारी समूहहरुले चलाएको आन्तरिक युद्दबाट क्षत विक्षत भएपछि झन्डै असफल राष्ट्र बनेको सोमालियामा अफ्रिकन र युरोपियन युनियन राष्ट्र र अमेरिकाले सैनिक सहयोग गर्दै आएको छ। जसमा छिमेकी केन्याको महत्वपूर्ण भूमिका रहेको छ। वाइल्ड लाइफ पर्यटनको लागि राम्रो गन्तब्य मानिने केन्यामा भईरहेका श्रृंखलाबद्द आतंकले हालका दिनमा यो राष्ट्र आफैमा अतिवादी आक्रमणको शिकार बन्ने गरेको छ।
अफ्रिकन राष्ट्र सोमालियाको गल्फ अफ एडेन जल मार्ग पार गर्दै हुँदै संसारको सबैभन्दा ठूलो पारवाहनमा असुरक्षा भएपछि यसको सुरक्षामा पश्चिमी देशहरुको चासो बढेको हो। अरबी राष्ट्रहरुमा मुस्लिम अतिवादी संगठन आइसिसले मच्चाएको आतंकतर्फ केन्द्रीत बनिरहँदा केन्यामा भएको कहालीलाग्दो आक्रमणले विश्वको ध्यान अफ्रिकातर्फ मोडेको छ।
