पार्टीको क्रान्तिकारी धार मानिएका नेत्रविक्रम चन्द विप्लवलाई कारबाही गर्ने विषयमा नेकपा–माओवादीका अध्यक्ष मोहन बैद्य किरण र रामबहादुर थापा बादलबीच नै फाटो देखिएको छ।
आफ्ना धारका नेता कार्यकर्ता बोलाएर केही दिनअघि कपिलवस्तुमा 'गोप्य' भेला गरेका विप्लवसँग स्पष्टीकरण माग्दै कात्तिक ३० गते अध्यक्ष किरण र महासचिब वादलले संयुक्त विज्ञप्ती निकालेका थिए।
त्यसबेला बसेको केन्द्रीय कमिटीको बैठकले विप्लवका उनका केही सहयोगी नेताहरूलाई मंसिर ३ गतेसम्म स्पष्टीकरण दिन उर्दी जारी गरेका थिए। त्यसपछि मंसिर ६ गते बोलाइएको बैठकबाट उनीहरूलाई कारबाही गर्ने योजना थियो।
पार्टीले क्रान्तिकारी धारमै रहनुपर्ने भन्दै पार्टी सचिब विप्लव एउटा गुटको नेतृत्व गरेर अघि बढिसकेका छन्।
स्पष्टीकरण सोधिएपछि विप्लवले पत्रकार सम्मेलन गरेर बैद्य र वादलले आत्मालोचना नगरेसम्म बैठकमा नबस्ने बताएका थिए। विप्लव र उनी निकट केन्द्रीय सदस्य तथा पोलिटब्यूरोहरू नआएपछि ६ गते शनिवार डाकिएको केन्द्रीय कमिटीको बैठक पनि बस्न सकेन।
नेकपा माओवादी निकट स्रोतले सेतोपाटीलाई दिएको जानकारीअनुसार बैठक सुरु हुनुभन्दा अघि नै किरण र वादलको समूहबीच विवाद सुरु भइसकेको थियो।
वादल पक्ष विप्लवहरूलाई कारबाही अगाडि बढाउनुपर्छ भन्ने पक्षमा छ भने किरण पक्षधर सकभर मिलेरै जाने मनसायमा छन्। यही विचार मेल नखाएपछि शनिवारको बैठक पनि सुरु नै हुन सकेन।
स्रोतका अनुसार शनिवारको बैठकअघि र विप्लवले पत्रकार सम्मेलन गरेर आत्मालोचनाको माग गरेपछि किरण र विप्लवबीच पटकपटक भेटवार्ता भएको थियो।
ती भेटवार्ताहरूमा सहभागी एक नेताका अनुसार पार्टी अध्यक्ष किरण विप्लवहरूलाई कारबाही नगर्ने, स्पष्टीकरणको निर्णय फिर्ता लिने र नयाँ समझदारी गरेर अघि बढ्ने कुरामा सकारात्मक देखिएका थिए।
तर, यही कुरामा महासचिब वादलसँग छलफल गर्दा भने वादले स्पष्टीकरणको निर्णय फिर्ता लिने, र विप्लवहरूसँग मिलेर जाने प्रस्ताव सिधै अस्वीकार गरेका थिए।
'किरण कमरेडहरू सकभर मिलेर पार्टीलाई अघि बढाऔँ भन्ने पक्षमा हुनुहुन्छ' स्रोत भन्छ'तर वादलको ग्रुप भने होइन, कारबाही हुनैपर्छ, स्पष्टीकरणको निर्णय पनि फिर्ता हुनुहुँदैन र पेलेरै जानुपर्छ भन्नुहुन्छ।'
अहिले अध्यक्ष बैद्यलाई सिपी गजुरेल, सोनाम, पूर्ण घर्तीलगायतकाले केही भएपनि साथ दिइरहेका छन्।
त्यस्तै देव गुरुङ, पम्फ भुषाल, हितमान शाक्य, महेश्वर दाहाललगायतका नेताहरू वादलको साथमा छन्। अध्यक्ष किरण र महासचिब वादलबीच नै समूह विभाजन भएर विवाद भएपछि अब बैठक पनि अनिश्चित भएको छ।