भारतीय प्रधानमन्त्री नरेन्द्र मोदीको धार्मिक भ्रमण स्थगीत भएको बिरोधमा शुक्रबार वीरगन्जमा पुतला दहन गरिएको छ। मधेसी जन अधिकार फोरमका कार्यकर्ताहरुले मोदीको भ्रमण स्थगीत भएको बिरोधमा शुक्रबार दिउँसो वीरगन्जमा पुतला दहन गरेका छन्।
सरकारको मधेस बिरोधी गतिविधिको कारण भारतीय प्रधानमन्त्री नरेन्द्र मोदीले जनकपुर जानकी मन्दिरमा पूजा गर्ने तथा बाँगहा मैदानमा नागरिक अभिनन्दन र सम्बोधन गर्ने कार्यक्रम स्थगीत भएको आरोप लगाउँदै प्रधानमन्त्री सुशील कोइराला तथा गृहमन्त्री बामदेव गौतमको वीरगन्ज स्थित घन्टाघरमा पुतला दहन गरेका हुन्।
तराइको जनकपुर र लुम्बिनीको भ्रमण स्थगीत भएको भन्दै मध्य तराईका जनतामा निरासा छाएको भन्दै मधेसको बिभिन्न जिल्लामा बिरोध प्रर्दशन भइरहेको फोरम नेपालका पर्सा अध्यक्ष प्रदिप यादवले बताए।
पुतला दहन पश्चात आयोजित कोणसभामा फोरम नेपालका केन्द्रीय उपाध्यक्ष एवम सभासद लालबाबु राउत, पूर्वमन्त्री करिमा वेगम ,जिल्ला अध्यक्ष प्रदिव यादव,सचिव नागेन्द्र यादव, नेता जसवन्त यादव लगायत विद्यार्थी नेताहरुले भ्रमण स्थगीत हुनु नेपाल सरकारको असक्षमता र मधेसी बिरोधी कार्य भएको बताएका थिए।