अख्तियार दुरुपयोग अनुसन्धान आयोग तथा वन विभागले वन विभागअन्तर्गत कर्मचारीको शैक्षिक योग्यता छानबिन सुरु गरेपछि सप्तरी जिल्ला वन कार्यालयका एक फरेष्टर र पाँचजना वन रक्षक जमदार सहित छ जना वन कर्मचारीले आफ्नो पदबाट राजीनामा दिएका छन्।
नक्कली शैक्षिक योग्यता पेस गरी बढुवा भएकाहरुको शैक्षिक योग्यता माग भएपछि राजीनामा दिइएको आशङ्का गरिएको छ।
यस विषयमा जिल्ला वन कार्यालय सप्तरीका प्रमुख नन्दलालराय यादवले राजीनामा दिने छ कर्मचारीको आफूले स्वीकृत गरेको बताउँदै राजीनामा दिने अधिकांशले घरायसी तथा स्वास्थ्य समस्या देखाएर राजीनामा दिएको बताए।
यसैबीच नेपाल सरकारले वन नीति निर्माण गर्न लागेको सम्बन्धमा जिल्ला सप्तरी वन क्षेत्र संवद्र्धन समितिले आवश्यक छलफलसमेत गरेको प्रमुख यादवले बताए।
त्यस्तै मोरङ जिल्ला वन कार्यालयमा कार्यरत १८ जना कर्मचारीले एक्कासि राजीनामा दिएका छन्। जसमा चारजना फरेष्टर तथा १४ जना जमदार पदका कर्मचारीले राजीनामा दिएको मोरङका वन कार्यालय प्रमुख दीपक ज्ञवालीले उल्लेख गरे।
त्यहाँ एक दर्जन थप कर्मचारीले राजीनामा दिएको तर स्वीकृत नभएको बुझिएको छ। रासस
