प्रधानमन्त्री सुशील कोइरालाले शुक्रबार बिहान दक्षिण एशियाली क्षेत्रीय सहयोग संगठनको १८ औं शिखर सम्मेलनको भौतिक तयारीको आकस्मिक निरीक्षण गरेका छन्।
प्रधानमन्त्री कोइरालाले सार्क शिखर सम्मेलनको अवसरमा प्रयोग हुने सडकमार्ग, त्रिभुवन अन्तराष्ट्रिय विमानस्थलमा अति विशिष्ट र विशिष्ट अतिथिको आगमन कक्ष र अतिथिहरुको बसोबास हुने होटल सोल्टी र शिखर सम्मेलन स्थल राष्ट्रिय सभागृहको प्रेक्षालयको निरीक्षण गरेका थिए।
प्रधानमन्त्री कोइरालाले सार्क सम्मेलनमा राष्ट्राध्यक्ष वा सरकार प्रमुख सहित सहभागी प्रतिनिधि र पर्यवेक्षकहरुलाई शिखर सम्मेलन अवधिका कार्यक्रममा सहभागी हुन आवत जावत गर्ने एअरपोर्ट सिनामंगल,तीनकुने ,नयाँबानेश्वर, बिजुलीबजार ,माइतिघर,थापाथली, त्रिपुरेश्वर, टेकु,कालिमाटी,सोल्टी होटल सम्मको मुख्य मार्ग र वैकल्पिक मार्गको रुपमा तयार गरिएको एअरपोर्ट, गौशाला, चाबहिल, महाराजगञ्ज हुँदै कलंकी पुग्ने चक्रपथको महाराजगञ्ज– त्रिभुवन अन्तराष्ट्रिय विमानस्थल खण्डको निरीक्षण गरे।
त्यस्तै प्रधानमन्त्री कोइरालाले अतिविशिष्ट पाहुनाहरुको आगमन र विदाइ हुने त्रिभुवन अन्तराष्ट्रिय विमानस्थलको भीभीआईपी प्रवेशद्वार र विश्राम कक्ष, भीआइपी प्रवेश कक्ष र विश्राम कक्षको स्थलगत निरीक्षण गरेका थिए।
उनले सो अवसरमा विश्राम कक्ष र अन्य कक्षहरुको निरीक्षण गर्दै सार्कमा सहभागी हुन आउने आमन्त्रित विदेशी अतिथिहरुलाई सहज रुपमा सेवा सुविधा उपलब्ध गराउन त्रिभुवन विमानस्थलका संबन्धित अधिकारीहरुलाई निर्देशन दिए। प्रधानमन्त्रीले सार्क सम्मेलन मुुलुकको प्रतिष्ठासंग गाँसिएकोले सरसफाईमा पनि विशेष ध्यान दिन निर्देशन दिएका थिए।
आजै प्रधानमन्त्री कोइरालाले १८ सार्क शिखर सम्मेलन स्थल राष्ट्रिय सभागृहको अतिविशिष्ट पाहुनाका लागि नवनिर्मित प्रतिक्षाकक्ष, मञ्चको सजावट, प्रेक्षालयको आसनको पनि अवलोकन गरेका थिए। उनले प्रेक्षालयका आसनहरुको बसेर निरीक्षण पनि गरे।
प्रधानमन्त्री कोइरालाले सभागृहको ध्वनि र प्रकाश व्यवस्थाको पनि परीक्षण अवलोकन गरेका छन्। प्रधानमन्त्री कोइरालाले निर्माण, मर्मत संभार र सौन्दर्यीकरणका कार्यहरु छिटो सम्पन्न गरी तयारी अवस्थामा राख्न र कार्यक्रम सक्रिय भूमिका निर्वाह गर्नुपर्ने व्यक्तिहरुलाई आवश्यक तालिम दिइ रिहर्सल गराउन पनि निर्देशन दिएका थिए।
