भारतीय प्रधानमन्त्री नरेन्द्र मोदीको सिको गर्दै पाकिस्तान प्रधानमन्त्री मुहम्मद नवाज सरिफ पनि सार्क शिखर सम्मेलनमा सहभागी हुन पाकिस्तानी विशेष सुरक्षा दस्ताका साथ काठमाडौं आउने भएका छन्। प्रधानमन्त्री सरिफको विशेष सुरक्षा दस्ता र दुई वटा वुलेट प्रुफ मोटर लिएर पाकिस्तान वायु सेनाको एयर कार्गो सि–१ ३० मंसिर ८ गते सोमबार काठमाडौं आउने भएको छ।
काठमाडौंस्थित त्रिभुवन विमानस्थलमा एयर ट्राफिक पार्किङस्थल अभावका कारण उक्त जहाज सुरक्षा दस्ता र दुई वुलेट प्रुफ मोटरका साथै अन्य सुरक्षा उपकरण झारेर तत्कालै स्वदेश फर्कने छ। प्राप्त जानकारी अनुसार उक्त एयर कार्गो जहाज तथा प्रधानमन्त्री सरिफ काठमाडौं आउने विशेष जहाज अवतरणका लागि नेपाल सरकारले स्वीकृती दिइसकेको छ।
प्रधानमन्त्री सरिफ भने मंसिर ९ गते मंगलबार पाकिस्तानी वायु सेनाको विशेष विमानबाट काठमाडौं आउने भएका छन्। उनी काठमाडौं आएपछि सिधै होटल सोल्टी प्रस्थान गर्ने छन्। सरिफलाई पाकिस्तानबाट आउने विशेष सुरक्षा दस्ता र नेपाली सेनाको विशेष सुरक्षा बलका सैनिकले सुरक्षा प्रदान गर्ने छन्।
सार्कमा सहभागी हुन भुटानका प्रधानमन्त्री ल्योञ्छेन छिरिङ टोव्गे र माल्दिभ्सका राष्ट्रपति अव्दुल्लाह यमेन अव्दुल गयुम मात्र नियमित उडानबाट काठमाडौं आउने भएका छन्। यी दुई मुलुकबाहेकका सार्क सदस्य राष्ट्रका सरकार प्रमुखहरु भने मंसिर ९ गते विभिन्न समयमा आफनो देशको विशेष विमानबाट काठमाडौं आउने कार्यक्रम तय भएको छ। अफगानिस्तानका राष्ट्रपति मोहम्मद असरफ घानीसमेत आफनै देशको विशेष विमानबाट काठमाडौं आउने भएका छन्।
सार्कमा सहभागी हुन आउने सरकार प्रमुखहरुलाई त्रिभुवन विमानस्थलमा नेपालका तर्फबाट उपप्रधानमन्त्रीले स्वागत गर्ने कार्यक्रम तय भएको छ। यसअघिको सार्कमा सहभागी हुन राष्ट्रप्रमुखको स्वागतमा राजा स्वयम् र सरकार प्रमुखको स्वागतमा प्रधानमन्त्री विमानस्थलसम्म जाने प्रचलन थियो।
सार्क राष्ट्रप्रमुखको स्वागतमा नेपालका राष्ट्रप्रमुखको तर्फबाट राष्ट्रपति कार्यालयका सचिव विमानस्थलमा सहभागी हुने समेत परराष्ट्र मन्त्रालयले जनाएको छ।
परराष्ट्र स्रोतका अनुसार श्रीलंकाका राष्ट्रपति महिन्दा राजापाक्ष ९ गते काठमाडौं विमानस्थलमा आईपुग्नासाथ उनी सोझै नेपाली सेनाको सुपरपुमा हेलिकोप्टर चढेर लुम्बिनी प्रस्थान गर्ने छन्। उनको भ्रमण दलमा २८ जना सहभागी हुनेछन्।
लुम्बिनीमा राष्ट्रपति राजापाक्षले सबैभन्दा पहिले मायादेवी मन्दिरको दर्शन तथा अवलोकन गर्ने छन्। उनले लुम्बिनी परिसरमा नवनिर्मित पुलको उदघाटन गर्नेछन्। त्यसपछि राष्ट्रपति राजापाक्षले श्रीलकंन मन्दिरमा पूजा गर्ने कार्यक्रम तय भएको छ। त्यस्तै लुम्बिनीमा उनले भिक्षु सागरसँग भेटवार्ता गर्ने, श्रीलकन अतिथि गृहको उद्घाटन गर्ने तथा बौद्ध विश्वविद्यालय भवनको अवलोकन गर्ने कार्यक्रम समेत रहेको थाहा भएको छ।
लुम्बिनी मै दिवा खाना खाएर राष्ट्रपति राजापाक्ष अपरान्ह काठमाडौं फिर्ता हुनेछन्। र, आरामका लागि होटल सोल्टीको रिगल स्वीटमा जानेछन्।
त्यसैगरी सार्क शिखर सम्मेलनमा सहभागी हुन काठमाडौं आउने भुटानी प्रधानमन्त्री ल्योञ्छेन छिरिङ टोव्गेले काठमाडौंमा बौद्धस्थित बौद्ध मन्दिर, पशुपतिनाथको मन्दिर र स्वयम्भुनाथ मन्दिरको दर्शन गर्ने कार्यक्रम तय भएको छ।
