हिन्दू राज्य माग गर्ने क्रममा शुक्रबार साँझ प्रहरीले बल प्रयोग गरेकोप्रति राप्रपा नेपाल नगर कार्यसमिति इटहरीले विरोध जनाएको छ ।
पत्रकार सम्मेलन गर्दै समितिले शुक्रबार साँझ गरिएको गृहमन्त्रीको पुत्ला दहन कार्यक्रममा प्रहरीले लाठीचार्जसहित बल प्रयोग गरेको घटनाको यथार्थ छानविन गरी दोषीलाई कारवाही गर्न समेत माग गरेको छ ।
हिन्दू राज्यको विषयमा गृहमन्त्री बामदेव गौतमले दिएको अभिव्यक्तिप्रति आपत्ती जनाउँदै समितिले इटहरीमा आयोजना गरेको र्याली तथा पुत्ला दहन कार्यक्रममा प्रहरीले लाठीचार्ज गर्दा एक दर्जन स्थानिय नेता कार्यकर्ता घाइते भएका थिए ।
प्रहरीले पुत्ला नियन्त्रणमा लिने क्रममा भएको लाठीचार्जमा राप्रपाका सभासद् रामकुमार सुब्बापुत्र सोसोहाङ लिम्बुलगायत स्थानिय नेता तथा कार्यकर्ताको टाउको तथा हातमा चोट लागेको थियो । लगत्तै केही कार्यकर्तालाई प्रहरी कार्यालय लगेर थुनिएको थियो ।
घटना अनपेक्षित भएको भन्दै इटहरीका प्रहरी प्रमुख डीएसपी विनोद शर्माले घटना भएकै साँझ माफी माग्दै घाइतेहरुको उपचार गरिदिने आश्वासन दिएपनि आश्वासन पुरा नगरेको राप्रपा इटहरी नगर अध्यक्ष रामु पोख्रेलले बताए ।
यता प्रहरीले भने घटना निर्देशनको विपरीत भएको जनाएको छ । सत्यतथ्य बुझ्न सइ निकाजीबहादुर बस्नेतसहितको तीन सदस्यीय छानविन समिति बनाएको व्यहोराको पत्र जारी गर्दै २४ घण्टाभित्र लाठीचार्ज गर्न निर्देशन दिनेको नामका साथै घाइतेहरुको विवरण दिन निर्देशन दिइएको छ।
पत्रमा कार्यकर्ताहरुलाई सम्झाइबुझाइ पुत्ला नियन्त्रणमा लिने तथा जटिल अवस्था आएमा कार्यालयप्रमुखलाई खबर गर्ने निर्देशन दिएर टोली पठाएको उल्लेख गर्दै लाठीचार्ज गर्ने प्रहरीसमेतको नाम दिन भनिएको छ ।
नेपाललाई हिन्दू राज्य घोषणा गर्न माग गर्दै आएको राप्रपा नेपालले शुक्रबार देशभर गृहमन्त्रीको पुत्ला दहन गर्ने कार्यक्रमअनुसार इटहरी समितिले इटहरीमा समेत कार्यक्रम गरेको थियो ।
