संवैधानिक–राजनीतिक संवाद तथा सहमति समितिको आजको बैठकमा प्रमुख तीन दलका शीर्ष नेताले आफ्नो पार्टीको तर्फबाट सम्झौताको पछिल्ला प्रस्ताव पेश गर्ने भएका छन् । संवाद समितिको बैठकअघि सुझाव संकलन गर्नका लागि संवाद समितिले आयोजना गरेको संविधानसभामा प्रतिनिधित्व गर्ने दलहरुको सर्वदलीय बैठकमा उपस्थित नेताहरुले प्रमुख तीन दलका तर्फबाट सम्झौताको प्रस्तावको माग गरेपछि समिति सभापति डा. बाबुराम भट्टराईले तीन दलको प्रस्ताव माग गरेका छन्।
विभिन्न दलका नेताहरुले राज्यको पुन:संरचना, शासकीय स्वरुप र निर्वाचन प्रणालीमा कसरी लचिलो भएर सम्झौताको विन्दु खोज्न सकिन्छ भन्ने विषयमा सुझावहरु दिएको उल्लेख गर्दै सभापति भट्टराईले भने– ‘उहाँहरुले प्रमुख तीन दल, नेपाली कांग्रेस, नेकपा एमाले र एकीकृत नेकपा माओवादीले सम्झौताको प्रस्ताव राखिदिए सुझाव दिन सजिलो हुने माग राख्नुभएको छ । त्यसैअनुसार संवाद समितिको बैठकमा तीन दलका प्रमुखहरुलाई आफ्ना पछिल्ला प्रस्ताव पेश गर्न भन्नेछु।’
प्रमुख तीन दलका शीर्ष नेताको प्रस्ताव आएपछि सबै दलहरुको सुझाव लिएर आइतबार बिहानसम्म पुन: सहमतिको निम्ति प्रयत्न गर्ने सभापति भट्टराईले जानकारी दिए।
सहमति निर्माणका निम्ति अन्तिम प्रयत्न गर्न सम्झौताका बुँदा के हुन सक्छन् भन्ने विषयमा संवाद समितिले संविधानसभामा रहेका सबै दलहरुको तर्फबाट अन्तिम सुझाव संकलन गर्ने प्रयास गरेको थियो ।
संवैधानिक–राजनीतिक संवाद तथा सहमति समितिको बैठक अहिले जारी छ।
