सरकारका प्रवक्ता एवम सूचना तथा सञ्चारमन्त्री डा. मिनेन्द्र रिजालले प्रदेशको रचना बाहेक शासकीय स्वरुप, निर्वाचन प्रणाली र न्यायप्रणालीमा सबै राजनीतिक दलहरूबीच अर्न्तमनमा सहमति भैसकेको भन्दै सहमति भएका विषयलाई मस्यौंदा समितिमा पेश गर्नुपर्ने बताएका छन्।
शनिबार रिपोटर्स क्लबमा आयोजित एक कार्यक्रममा मन्त्री रिजालले संविधानका विवादित विषय संघियताको प्रदेशको रचनावाहेकका सबै विषयमा सहमती जुटिसकेको बताउँदै खाली औपचारिकता दिन बाँकी रहेको धारणा राखेका हुन्।
'संघियता अनुसुचिमा भए बमोजिम हुनेछ भन्ने संवैधानिक व्यवस्था गरेर अरु विषयलाई तत्काल मस्यौदा समितिमा पठाउनुपर्छ।' उनले सहमती भैसकेका विषयमा पनि दलहरुले अझै पनि मुख नखोलेर बार्गेनिङ् गर्न खोजेको आरोप समेत लगाएका छन्।
मन्त्री रिजालले समाजले यस्ता खाले कार्यक्रमको आयोजना गरेर प्रशंनीय र अनुकरणीय काम गरेको भन्दै बधाई समेत दिएका छन्। उनले भने–'सबै सामाजिक संस्थाहरुले यस्तै काम गरे राष्ट्र समृद्धिको बाटोमा अघि बढ्नेछ। यो कार्यलाई धादिङ्मा मात्रै सिमित नगरेर सबैतिर पुर्याउनुपर्छ।'
कार्यक्रममा ज्यामरुङ् जनकल्याण समाजले धादिङ् त्रिपुरेश्वर वडा नम्बर २ सुकौराका दुबै मृगौला फेल भएका भीमसेन ढकालको उपचारका लागि संकलन गरेको तीन लाख ९१ हजार छ सय २० रुपैयाँ नगद रकम सञ्चारमन्त्री डा. मिनेन्द्र रिजाल एवम् रिपोर्टर्स क्लबका अध्यक्ष ऋषि धमलाले संयूक्त रुपमा हस्तान्तरण गरेका थिए।