संवैधानिक–राजनीतिक संवाद तथा सहमति समितिका सभापति डा. बाबुराम भट्टराईले संवाद समितिले आइतबार संविधानसभामा प्रतिवेदन बुझाउनुअघिसम्म पनि सहमतिको पहललाई जारी राख्ने बताएका छन्।
संविधानसभाका अध्यक्ष सुवासचन्द्र नेम्वाङसँग प्रधानमन्त्री तथा कांग्रेस सभापति सुशील कोइराला, एमाले अध्यक्ष केपी ओली, एमाओवादीका अध्यक्ष पुष्पकमल दाहाल ‘प्रचण्ड’, मस्यौदा समितिका सभापति कृष्णप्रसाद सिटौला र संवाद समितिका सभापति भट्टराईसहितको बैठकपछि सभापति भट्टराईले भने, ‘बैठकमा सबैले सहमतिबाटै संविधान बनाउन अन्तिम क्षणसम्म नै बल गर्नुपर्छ भन्नुभएको छ। कतिपय नेताहरुले त सहमतिको विकल्प भनेको अझ ठूलो सहमति, अझ फेरि सहमति हो त्यसको अर्को विकल्प छैन भन्नुभयो ।’
सबैको सुझाव र धारणाका आधारमा संवाद समिति र दलहरुले आइतबार संविधानसभालाई प्रतिवेदन बुझाउनुअघिसम्म पनि सहमतिको पहललाई जारी राखिने भट्टराईले जानकारी दिए।
आज बिहान सिंहदरबारस्थित संविधानसभाका अध्यक्षको कार्यकक्षमा भएको बैठकको आयोजना संवैधानिक–राजनीतिक संवाद तथा सहमति समितिले गरेको थियो ।
आज दिउँसो २ बजे संवाद समितिको बैठक बस्नुअघि संवैधानिक–राजनीतिक संवाद तथा सहमति समितिमा रहेका सबै दलका शीर्ष नेताहरुको पनि बैठक राखिएको छ ।
