राजधानीमा सत्ता पक्षधर र विपक्षी नेताहरुबीच दोहोरी चल्नु नयाँ कुरा होइन। सधै सहमतिका लागि बैठक बस्छ र दोहोरी निष्कर्ष बिहिन बन्छ। शुक्रवार लहानमा पनि यस्तै भयो। सत्तापक्षधर र विपक्षी सभासदहरुको दोहोरी चल्यो।
'हाम्रो सरोकार, हाम्रो संविधान’ विषयक सभासदसँग जनताको प्रत्यक्ष सम्वाद कार्यक्रममा सत्तापक्षधर सभासदहरुले माघ ८ गते संविधान जारी हुने ठोकुवा गरे। विपक्षी सभासदहरु भने काँग्रेस एमालेकै हठका कारण माघ ८ मा संविधान जारी नहुने दोवी गरे।
कार्यक्रममा नेपाली काँग्रेस सिरहा क्षेत्र नम्बर १ बाट निर्वाचित सभासद पदम नारायण चौधरीले माघ ८ मा संविधान जारी हुने दाबी गरे।
उनले भने, 'तपाईहरु ढुक्क हुनुस्। संविधान माघ ८ गते नै जारी हुन्छ। कांग्रेस एमालेले सात प्रदेशको खाका प्रस्तुत गरिसकेको छ। यही खाँकामा मधेशवादी दल र एमाओवादीले सहमति गर्नुपर्छ। होइन् भने प्रक्रियामा गएर संविधान जारी हुन्छ।’
कार्यक्रममा उपस्थित सत्तापक्षधर एमालेका सभासदद्धय रामचन्द्र यादब र आशादेवी यादबले पनि काँग्रेस सभासद चौधरीकै भनाईलाई समर्थन गरे। सभासद चौधरीले भनेकै कुरा दोहोर्याए। काँग्रेस सभासद रामचन्द्र यादब पनि उनकै बोली बोले।
तर सत्तामा रहेका एमालेका यूवा नेता सत्यनारायण यादबले माघ ८ गते संविधान जारी नहुने ठोकुवा गरे।
उनले भने, 'माघ ८ मा संविधान आउँदैन्। संविधान आउँछ भन्नेहरुले नाटक मात्र गरेको हो। संविधान कहिले जारी हुन्छ भन्ने सही कुरा जनतालाई बताइदिन आ आफ्नो अध्यक्ष ज्यूहरुलाई यहाँ उपस्थित सभासद ज्यूहरुले भन्न मेरो आग्रह छ।’
यता सत्ता बाहिर रहेका एमाओवादी र मधेशवादी दलका सभासदहरु पनि काँग्रेस एमालेकै कारण माघ ८ गते संविधान जारी नहुने भन्दै चिन्ता व्यक्त गरे। फोरम नेपालका समानुपातिक सभासद डा. विरेन्द्र महतोले प्रक्रियामा गएर संविधान घोषणा गर्ने दम्भ एमाले काँग्रेसले त्याग्नुपर्ने बताए।
मधेशी, सिमान्कृत जनताको अधिकार र पहिचान झल्किने संविधान आउन षडयन्त्र गरे दुई तिहाई जनता सडकमा आएर संविधान च्यातेर फाल्ने सभासद डा. महतोले बताए। उनले विगतमा मधेशी, आदिवासी जनजातिसंग गरेको विभिन्न बुँदे सम्झौताहरुलाई वेवास्ता गरे आन्दोलन गर्ने उनको भनाई थियो।
आ–आफनै दलीय अडानमा सभासदहरुको आडान देखेपछि समयमा संविधान नआउने संभावनाले निरासा बनाएको लहान बहुमुखी क्याम्पसका प्रध्यापक जितेन्द्र चौधरीले बताए। अडान छोडेर विचको वाटो रोजेर सहमतिकै अधारमा आउने संविधान टिकाउ हुने उनको भनाई थियो।
कार्यक्रममा बुद्धिजिविद्धय डा. नमोनारायण झा र डा. महादेव साहले नेताहरुबीच सहमति हुन नसकेकोमा दुःख व्यक्त गरेका थिए।
