नेकपा (एमाले) केन्द्रीय कमिटीको आज बसेको तेस्रो पूर्ण बैठकमा नेता माधवकुमार नेपालले पार्टी नेतृत्व एकलौटी रुपमा चल्न थालेकामा ध्यानाकर्षण गराएका छन्।
बैठकमा अध्यक्ष केपी शर्मा ओलीले कार्यसूची प्रस्तुत गरेपछि नेता नेपालले समय माग गरी डेढ घन्टा लामो लिखित बक्तव्य पढेर ध्यानाकर्षण गराएका थिए। निर्धारित कार्यसूचीमा छलफल हुन नपाई यही कात्तिक १८ गतेसम्मका लागि बैठक स्थगित भएको छ । नेता नेपालले आफूले उठाएका विषयमा स्पष्ट जवाफ आएपछि मात्रै नियमित कार्यसूचीमा प्रवेश गर्न माग गरेका थिए।
केन्द्रीय सदस्य डा. राजन भट्टराईले नयाँ संविधान निर्माणका लागि राजनीतिक दलसँग सहमतिको प्रयासका लागि समय चाहिने भएकाले १८ गतेसम्म बैठक स्थगन गरिएको बताए।
वैकल्पिक केन्द्रीय सदस्य रचना खड्काका अनुसार नेता नेपालले सुकुम्बासी समस्या समाधान आयोगको गठन, मनोनीत सभासद्को चयन, मन्त्रीहरुको हेरफेर, विधान प्रकाशन, राजनीतिक नियुक्तिलगायतका विषयमा असन्तोष प्रकट गर्दै परामर्श र छलफल गरेर संस्थागत निर्णयका आधारमा पार्टी सञ्चालन गर्न आग्रह गरेका थिए।
स्थायी र पोलिटब्युरो सदस्यको चयन, कार्यविभाजन, भावी कार्ययोजना र केन्द्रीय कमिटी सदस्य मनोनयनका विषय बैठकको कार्यसूचीमा थिए । रासस