विभिन्न दलसँग आवद्ध ११ विद्यार्थी संगठनले सरकारले तत्काल यातायातको भाडा बढाए कडा आन्दोलन गर्ने चेतावनी दिएका छन्। वागबजारस्थित एमालेनिकट अनेरास्ववियूको कार्यालयमा शुक्रबार बसेको वैठकले यस्तो निर्णय गरेको हो। अन्तर्राष्ट्रिय वजारमा तेलको भाउ लगातार घटिरहेका बेला सोही अनुरुप यातायातको भाडा घटाउनु पर्ने उनीहरुको माग छ। वैठकमा नेविसंघ, अनेरास्वविय, अखिल क्रान्तिकारी लगायतका संगठनका प्रतिनिधिको उपस्थिति थियो।
दुई महिना पछि बसेको ११ विद्यार्थी संगठनको वैठकले माघ ८ मै सहमतिमा संविधान जारी गर्न प्रधानमन्त्री लगायत अन्य नेताहरुलाई ध्यानाकर्षण पत्र बुझाउने निर्णय पनि गरेको छ। स्ववियूको निर्वाचन, त्रिविको सेमेस्टर प्रणाली र पोखरा विश्वविद्यालयमा अख्तियारले छापा मारेको विषयमा पनि सम्बधित पक्षको ध्यानाकर्षण गर्ने सहमति भएको बैठकमा सहभागी नेविसंघ प्रवक्ता युपी लामिछानेले सेतोपाटीलाई बताए। वैठकले आइसिसी डिभिजन थ्रीको विजेता नेपाली क्रिकेट टोलीलाई पनि बधाई दिएको छ ।
