नेपालका लागि रुसका राजदुत डा. सेरेगेई भ्यासिलोभिच भेलिच्किनले यान्त्रिक पहिचानको आधारमा संघिय राज्य बनाउन नहुने सुझाव दिएका छन्।
बिहिबार रिपोर्टर्स क्लब नेपालले आयोजना गरेको साक्षात्कार कार्यक्रममा राजदूत भेलिच्किनले सिमान्तकृत तथा पिछडीएका वर्गहरुलाई मूलधारमा ल्याउन पहिचान आवश्यक भएता पनि पहिचानका आधारहरु प्रयोगात्मक र उपयोगितात्मक हुनुपर्ने धारणा राखेका हुन्।
राजदूत भेलिच्किनले सामाजिक सभ्यता र साँस्कृतिक आकार निर्धारणमा पहिचानको अत्यन्तै महत्वपूर्ण भएपनि यो अतिसंवेदनशील तथा बहुआयामिक समस्याहरु जोडिएको बताएका छन्। उनले भने–'पहिचान सम्बन्धि सबै पक्षहरु पहिल्यै नै पहिल्याउन सकिँदैनन् किनकी यो निरन्तर विकसित तथा परिमार्जित हुने गर्दछ, त्यसैले राजनीतिक संवादले यो तथ्यलाई आत्मासाथ गर्दै पहिचाको मुद्दालाई लचिलोका साथ समाधान गर्नुपर्छ।'
उनले नेपालमा राज्यको पूर्नसंरचना गर्दा धेरै कुरामा ख्याल गर्नुपर्ने र पहिचान र सामर्थ्यको वारेमा पनि व्यापक छलफल गरेर टुग्याउनुपर्ने सुझाव दिएका छन्।
यसै सन्दर्भमा उनले रुसको संघियताको उदाहरण दिँदै जनताका अपेक्षाहरुलाई आत्मसाथ गर्न रुसको संविधान, संघिय राज्यका सिमाहरु र ऐन नियमहरु पटक–पटक संशोधन भएको जिकिर गर्दै नेपालले पनि भविष्यका आवाश्यकता र आकांक्षाहरुलाई समय सापेक्ष आत्मसाथ गर्नसक्ने संविधानको निर्माण गर्न सुझाव दिए।
नेपालवारे आफ्नो व्यक्तिगत अनुभव सुनाउँदै राजदूत भेलिच्किनले विगत दुई वर्षयता नेपाली जनता र राजनीतिक दलहरु संविधान निर्माण सँग सम्बन्धित विवादहरु प्रति बढी संवेदनशील र तिनीहरुको निराकरण गर्न अग्रसर रहेको आफूले पाएको बताउँदै नेपालले चाँडै नै नयाँ संविधान पाउने आशा व्यक्त गरे। नेपालका राजनीतिक दलहरुले प्रतिबद्धता जाहेर गरे अनुसार नै संविधान जारी होस भन्नेमा आफ्नो पनि चाहना रहेको उनले बताए।
नेपालमा रुसी लगानीवारे टिप्पणी गर्दै राजदूत भेलिच्किनले केही रुसी व्यापारी तथा लगानीकर्ता नेपालमा लगानी गर्न ईच्छुक रहेको बताउँदै त्यसको लागि नेपालमा राजनीतिक स्थिरता हुनुपर्ने धारणा राखे।
फरक सन्दर्भमा उनले यही नोभेम्बर महिनाको पहिलो र दोस्रो साता काठमाडौमा 'नेपालमा रुसी संस्कृतिका दिनहरु' नामक साँस्कृतिक कार्यक्रम गर्ने समेत जानकारी दिएका छन्। उक्त कार्यक्रम नोभेम्बर ४, ६, १२, १७ र १९ गते हुनेछन्। नेपाल प्रज्ञा प्रतिष्ठान कमलादीमा हुने कार्यक्रमको समउद्घाटन नेपालका उपराष्ट्रपती परमानन्द झाले गर्नुहुने पनि राजदूतले जानकारी दिए।
