एमाओवादीसहित २२ दलले राजधानीमा गरेको चियापान कार्यक्रममा सहभागी शीर्षनेताहरूले तोकिएकै समयमा संविधान निर्माणमा जोड दिएका छन्।
चियापान कार्यक्रममा बोल्दै प्रधानमन्त्री सुशील कोइरालाले समयमै संविधान आउनेमा कुनै शंका नगर्न आग्रह गरेका छन्।
प्रधानमन्त्रीले नेपाली जनताले नेपालका राजनीतिक दलप्रति आशा र भरोसा गरेको उल्लेख गर्दै 'नेपालीको चेहरामा मैले आशा देखेको छु,' उनको भनाइ थियो, 'राजनीतिक पार्टीको नेतृत्वप्रतिको भरोसा गर्नुभएको छ।'
एमाओवादी अध्यक्ष पुष्पकमल दाहालले १२ बुँदे सहमतियताका सम्झौता र प्रतिबद्धता नबिर्सन आग्रह गरे । 'हिजो गरेका सम्झौता, सहमति र प्रतिबद्धता विर्स्यौं भने त्यो दुर्भाग्यपूर्ण पनि हुन सक्छ,' दाहालले भने, 'अनि हाम्रो मौलिकता भनेको पनि अभिषाप पनि हुन सक्छ ।'
दाहालले नेपालका राजनीतिक दलहरुले महत्त्वपूर्ण कामहरु सहमतिमै गरेको उल्लेख गर्दै संविधान पनि सहमतिमै निर्माण गर्न सक्षम रहेको उल्लेख गरे ।
चियापान कार्यक्रममा सहभागी एमाले नेता माधवकुमार नेपालले नेपालले माघ ८ मा संविधान जारी गर्न सवै राजनीतिक दलको अठोट, लचकता र प्रतिबद्धता हुन आवश्यक रहेको औल्याए। कार्यक्रममा २२ दलका अधिकांश शीर्ष नेताको सहभागिता थियो।