संवैधानिक, राजनीतिक संवाद तथा सहमति समितिका सभापति डा. बाबुराम भट्टराईले तिहारमा पनि राजनीतिक भेटवार्तालाई तिब्रता दिएका छन्। संविधानका अन्तरबस्तुमा रहेका विवादमा सहमति निर्माणको गृहकार्यस्वरुप सभापति भट्टराईले भेटवार्तालाई तिब्रता दिएका हुन्।
यसै क्रममा सभापति भट्टराईले आज प्रधानमन्त्री तथा नेपाली कांग्रेसका सभापति सुशील कोइरालासँग भेटवार्ता गरी सहमति निर्माणका लागि आग्रह गर्दै प्रधानमन्त्रीको सहमति निर्माणको निम्ति वलियो भूमिकाको आफूले अपेक्षा गरेको बताएका छन्। पहिलो चरणमा प्रमुख तीन दलका बीचमा गोकर्णमा भएको बैठकका बारेमा पनि सभापति भट्टराईले जानकारी गराएका थिए। भेटवार्ताका क्रममा सभापति भट्टराईले आइतबारदेखि हुन लागेको दोस्रो चरणको बैठकमा सहमति हुने विश्वास समेत व्यक्त गरे।
प्रधानमन्त्री कोइरालाले चाँडो सहमति गरेर संविधान जारी गर्नुपर्नेमा जोड दिएका थिए। त्यसका लागि आफूले सक्दो भूमिका खेल्ने पनि उनको भनाई थियो।
सभापति भट्टराईले सहमति निर्माणका लागि गृहकार्यस्वरुप शुक्रबार एमाले अध्यक्ष केपी ओली र एमाओवादी अध्यक्ष प्रचण्डसँग छुट्टाछुट्टै भेटघाट गरेका थिए।
आइतबार पनि भट्टराई राजनीतिक गृहकार्यमै व्यस्त
सभापति भट्टराईले आइतबार प्रमुख तीन दलको बैठकअघि पनि गृहकार्यलाई निरन्तरता दिने भएका छन्। आइतबार बिहान संवैधानिक राजनीतिक संवाद तथा सहमति समितिको संयोजनमा तीन दलका शीर्ष नेताहरुको उपस्थितिमा दलहरुका बीचमा रहेको विवादका विषयहरुः न्यायप्रणालीका सम्बन्धमा प्रधानन्यायाधीश तथा सर्वोच्चका न्यायाधीशहरुसँग भेटवाताको कार्यक्रम तय भएको छ। साथै निर्वाचन प्रणालीका बारेमा प्रमुख निर्वाचन आयुक्त तथा निर्वाचन आयुक्तहरुसँग पनि आइतबार बिहान छलफल हुने भएको छ।
सिंहदरबारमा हुने यी छलफलपश्चात आइतबार अपरान्ह प्रमख तीन दलका शीर्ष नेताहरुका बीचमा पहिले छुट्टाछुट्टै र सोमबार सामूहिक रुपमा बैठक बस्नेछ। संवाद समितिकै संयोजनमा प्रमुख दलका बीचमा बैठक हुन लागेको हो। संवाद समितिलाई सहमति कायम गर्ने समयावधि कात्तिक १५ गतेसम्मका लागि तोकिएको छ।