उपप्रधान तथा गृहमन्त्री बामदेव गौतमले सहमति हुन नसके दुई तिहाई बहुमतबाट संविधान जारी गर्ने दृढता ब्यक्त गरेका छन्।
सहमतिमा तोकिएकै समयमा संविधान निर्माणको लागि दवाव दिने उद्देश्यले रिपोर्टर्स क्लब नेपालले सुरु गरेको देउसी भैलो कार्यक्रममा बोल्दै उनले दलहरु सहमतिकै प्रयासमा रहेको स्पष्ट पार्दै सहमति हुन नसकेको अवस्थामा दुई तिहाईबाट संविधान जारी गर्नुको विकल्प नभएको बताए।
उनले भने–काग्रेस एमाले, राप्रपा, मालेसहितका दलहरु दुई तिहाई बहुमत भन्दा बढीको स्थितिमा छन्।
गौतमले दलहरुले जनतासँग माघ ८ गते संविधानजारी गर्ने प्रतिबद्धता ब्यक्त गरेकोले त्यसलाई जुनसुकै मुल्य चुकाएर भए पनि पुरा गर्नु पर्ने भन्दै एमाओवादीको सहमतिमा पनि नआउने र प्रक्रियामा पनि नजाने कस्तो ब्यवहार हो? भनि प्रश्न गरे।
एमाओवादीको स्वार्थको कारण राज्यपुर्नसंरचनाको विषयमा समस्या उत्पन्न भएको भन्दै सबै जातजाती मिलेर बसेको मुलुकमा एकलजातीय राज्य हुनै नसक्ने स्पष्ट पारे।
उनले भने, 'एकल जातीय भनेको जातीय द्धन्द हो। यस विषयमा सम्झौता गर्न सक्दैनौ पुनः द्धन्द सृजना गर्न सहमति गर्न सकिदैन। साझा नाममा जान्छौ।'
गौतमले अन्तरिम संविधानको ब्यवस्था अनुसार प्रक्रियामा जाने स्पष्ट पार्दै केही दलहरु सहमतिमा अडचन पुर्याएर नेपाली जनतालाई अधिकार र विकासबाट बञ्चित गर्ने षडयन्त्रमा लागेको दाबी समेत गरे।
उनले संबैधानिक राजनीतिक संबाद तथा सहमति समितिका संयोजक डा बाबुराम भटट्राई सहमति गर्न असफल भएको आरोप समेत उनले लगाए।