राप्रपा नेपालका अध्यक्ष कमल थापाले हिन्दुराष्ट्र नभए संविधान अस्विकार गर्ने बताएका छन्।
राप्रपा नेपालले यसअघि घोषणा गरेको पार्टीले देशभर गाई पूजा गर्ने पुर्व निर्धारित कार्यक्रम अनुरुप थापाले शुक्रबार बिहान राजधानीको गौशालामा गाई पूजा गर्दै हिन्दुराष्ट्रलाई कुनै पनि हालतमा कायम गरिनुपर्ने भन्दै संविधानमै त्यसबारे व्यवस्था हुनुपर्नेमा जोड दिएका थिए।
उनले संघीयता, शासकीय स्वरुप, धर्मनिरपेक्षता, गणतन्त्र लगायतका विषयमा जनमत संग्रह हुनुपर्ने भन्दै यसो हुन नसके सविंधानसभा ठप्प पारेर भएपनि नेपाललाई हिन्दुराष्ट्र कायम गराउन दबाब दिने बताए।
सोहि अवसरमा थापाले नेपाललाई हिन्दु राज्य घोषणा गर्नुपर्ने माग गर्दै पार्टीले थालेको हस्ताक्षर अभियानको शुभारम्भ समेत गरेका थिए। हस्ताक्षर अभियान देशका ७५ ओटै जिल्लामा आजदेखि १५ दिनसम्म जारी रहने राप्रपा नेपालका मोहन श्रेष्ठले जानकारी दिए।
कार्यक्रममा बोल्दै थापाले हिन्दु धर्मको रक्षा तथा संस्कृतिलाई निरन्तरता दिनको लागि गाईको पूजा गरिएको बताए। उनले देशका ७५ ओटै जिल्लामा गाई पूजा गर्न लागिएको जानकारी दिँदै यसबाट देशलाई हिन्दु राष्ट्र कायम गर्नको लागि सकारात्मक दवाव पुग्ने विश्वास लिएका छन्।