प्रधानमन्त्री सुशील कोइरालाले छ दशकभन्दा लामो समयदेखि प्रजातन्त्रको स्थापना, पुनःस्थापना र विकासका लागि जनताले गरेका आन्दोलनको उपलब्धिका रूपमा प्राप्त सङ्घीयता, लोकतन्त्र, गणतन्त्र र समावेशीतालाई संस्थागत गर्ने जिम्मेवारीलाई पूरा गर्न सबैले साथ दिनुपर्ने खाँचो औँल्याएका छन् ।
महान चाड दीपावलीसहित तिहारको अवसरमा उनले आज दिएको सन्देशमा आपसी सहमति, सहकार्य, एकता र मेलमिलापको माध्यमबाट उक्त ऐतिहासिक जिम्मेवारी पूरा गरी मुलुकलाई विकासको नयाँ चरणमा प्रवेश गराउन सकिने भएकाले सबैको साथ आवश्यक भएको उल्लेख गरेका छन् ।
उनले नयाँ परिवेशमा मनाउन लागिएको तिहारले नेपालीले बढो उत्साह र अपूर्व सहभागिता जनाएर निर्वाचित गरेको संविधानसभा अहिले लोकतान्त्रिक संविधान निर्माणमा सक्रियरूपले लागि परेको बताएका छन् ।
प्रधानमन्त्री कोइरालाले सङ्घीयता र गणतन्त्रसहितको लोकतान्त्रिक संविधानको निर्माण भएपछि मात्र राजनीतिक र संवैधानिक सङ्क्रमण पार गरी विकासमा लाग्ने अवसर प्राप्त हुने उल्लेख गर्दै भनेका छन् –‘दीपावलीले नेपालको अभिसापका रूपमा रहेको सबै खालका अँध्यारोमाथि विजय पाउने प्रेरणा दिन सकोस् ।’
