संवैधानिक राजनीतिक संवाद तथा सहमति समितिका सभापति डा. बाबुराम भट्टराईले कात्तिक ४ र ५ गतेको गोकर्ण बैठकले दलहरुका बीचमा सकारात्मक वातावरण बनाएको बताएका छन्।
संवाद समितिको संयोजनमा तीन दलका शीर्ष नेताहरुको दुई दिनसम्म चलेको बैठकपछि सभापति भट्टराईले भने,‘छलफलका क्रममा शीर्ष नेताहरुका बीचमा संविधानमा सहमति कायम हुन बाँकी रहेका विषयहरु: राज्यको पुन:संरचना, शासकीय स्वरुप, निर्वाचन प्रणाली र न्याय प्रणाली, यी विषयमा गम्भीर ढंगले कुराकानी भयो । सबै विषयमा सहमति बन्न सकेको त छैन तर सबै दलहरुले आ–आफ्ना भनाइहरु खुला र स्पष्ट राखेको, एक–अर्काप्रतिका शंका–आशंका निवारण गर्न प्रयत्न गरेको र त्यसले एउटा सकारात्मक वातावरण बनाएको छ । तर, यी महत्वपूर्ण विषयहरुमा सहमति जुट्न सकेको छैन।’
दुई दिनसम्म चलेको बैठकमा औपचारिक र अनौपचारिक, समूहगतरुपमा र छुट्टाछुट्टै छलफलहरु भएका थिए ।
‘दलहरुका बीचमा खासगरी संघीयताको प्रश्न, शासकीय स्वरुप र निर्वाचन प्रणालीमा अहिले पनि गम्भीर प्रकृतिका मतभेदहरु यथावत छन् । फेरि पनि १२ बुँदे समझदारीदेखि यताका सहयात्रीहरुका बीचमा सहमति आवश्यक छ भन्ने बोध र प्रतिवद्धता सबैबाट व्यक्त भएको छ’, उनले भने,‘तिहारभर सबैले आ–आफ्नो पार्टीमा सर–सल्लाह गर्ने र तिहारको लगत्तै ९ गते फेरि बैठक बसेर यी विषयहरुलाई टुंगो लगाउने भन्ने सहमति भएको छ ।’
