पर्यटनबोर्डमा भ्रष्टाचार गरेको सार्वजनिक आरोप खेपिरहेका कायममुकायम कार्यकारी प्रमुख सुवास निरौलालाई अन्तत लेखा समितिले पनि आर्थिक अनियमितताको आरोप लगाएको छ।
बुधवार, समितिले उनलाई निलम्बन गर्न सरकारलाई निर्देशन नै दियो।
समितिले बोर्डमा निरौलाले गरेका आर्थिक अनियमितता र पदीय दुरुपयोग गरेको भन्दै समितिले उनी विरुद्ध कारबाहि गर्ने ६ बुँदे निर्णय गरेको छ।
निरौलाले बोर्डमा सार्वजनिक खरिद ऐन विपरित खरिद गर्ने, प्रमाण र औचित्य विना खरिद गर्ने गरेको समितिले फेला पारेको छ।
निरौललाले, असम्बन्धित व्यक्तिलाई गैरकानूनी भूक्तानी दिने, लेखाका विवरणहरु सहि र यथार्थ नराख्ने लगायतका क्रियाकलाप गरेको पनि समितिको आरोप छ।
आर्थिक कारोवारमा पारदर्शिता, मितव्ययीता, जवाफ देहिता र आर्थिक अनुसाशन जस्ता कुराहरु वेवास्ता गर्दै बोर्डको करौडौं रकम अनियमित गर्ने कार्यमा निरौला संलग्न रहेको भन्दै समितिले उनलाई निलम्बन गर्न सरकारलाई निर्देशन दिएको हो।
लामो समयदेखि बोर्डको आर्थिक र प्रसाशनिक विषयमा छानविन गर्दै आएको लेखा समितिले निरौलामाथि लागेका आरोपका विषयमा पर्यटन मन्त्रालयबाट गठित छानविन समितिको प्रतिवेदन र महालेखा परिक्षकका प्रतिवेदनमा उल्लेखित बेरुजुलाई समेत आधार लिई अनुसन्धान गरेको थियो।
गरी आवश्यक कारबाही गर्न पर्यटन मन्त्रालय, अख्तियार दुरुपयोग अनुसन्धान आयोग र सम्पत्ति सुद्धिकरण अनुसन्धान विभागलाई निर्देशन दिएको छ।
साथै समितिले यस सम्बन्धि कार्य प्रगति विवरण हरेक महिना समितिमा उपलब्ध गराउन समेत निर्देशन दिएको छ।
कार्यकारी प्रमुखको नियुक्ति हुन नसकेको अवस्थालाई मध्यनजर गर्दै बोर्डको नियम आवश्यक संशोधन गरी खुल्ला प्रतिस्पर्धाको माध्यमबाट योग्य दक्ष र उच्च चरित्रवान व्यक्तिलाई तत्काल कार्यकारी प्रमुख नियुक्त गर्न पर्यटन मन्त्रालयलाई निर्देशन दिएको छ।
साउन २ गते बसेको बोर्ड सञ्चालक समितिको १९२ आँै बैठकमा सहभागी भएर विवादित निर्णय गर्ने बोर्डका अध्यक्ष र सदस्यहरु समेतलाई आर्थिक र प्रशासनिक अनियमितताको दोषी ठहर गरेको छ।
उनीहरुलाई पनि आवश्यक अनुसन्धान र कानुनी कारबाहीको प्रक्रियाका लागि अख्तियार दुरुपयोग अनुसन्धान आयोगलाई लेखि पठाउने भएको छ।
सञ्चालक समितिको उक्त बैठकको अध्यक्षका रुपमा तत्कालिन पर्यटन सचिव सुशील घिमिरेले बोर्डको निर्णय पुस्तिकामा दोहोरो उपस्थिती हस्ताक्षर गर्दै बोर्डको भुक्तानी दिनुपर्ने १ करोड २१ लाखको सट्टा ७ करोड ४० लाखको स्विकृति दिएको थियो।
त्यसैगरी सरकारी सचिव संलग्न बोर्डको बैठकले कामु कार्यकारी प्रमुख निरौलाको निजी सुरक्षाका लागि २६ जना बाउन्सरलाई राख्न अनुमति दिएका थिए।
पर्यटनसँग सम्बन्धित पर्यटन बोर्ड, ट्रेकिङ एसोशियसन नेपाल, नेपाल माउन्टेनियरीङ एसोसिएशन बीचको सम्बन्ध, राजस्व बाँडफाँट, खर्च प्रक्रिया, लेखा पालन र लेखा परिक्षण प्रक्रियालाई पारदर्शी बनाउन र्काविधिगत सुधार गर्न समेत सम्बन्धीत निकायलाई समितिले निर्देशन दिएको छ।
साथै पर्यटन क्षेत्रको वर्तमान र भावी आवश्यकतालाई दृष्टिगत गरी पर्यटन बोर्डलाई क्षेत्रगत, विषयगत समायोजन हुने गरी संगठन पुर्नसंरचना गर्न पनि निर्देशन दिएको छ।
