संविधानका विवादित विषयमा सहमति खोज्न आज पनि गोकर्ण रिसोर्टमा प्रमुख तीन दलका नेताहरुको बैठक बसिरहेको छ।
मंगलबार दिनभर रिसोर्ट बसी एक्लाएक्लै र सामूहिक वार्तामा व्यस्त रहेका कांग्रेस, एमाले र एमाओवादीका नेता आ–आफ्नै अडानमा रहेपछि आज बिहान नौ बजे पुनः औपचारिक बैठकमा सहभागी हुने भन्दै केही नेताहरु बाहिरिएका थिए भने केही नेताहरू त्यतै बसेका थिए।
अहिले ९ बजेबाट सुरू भएको बैठकमा अघिल्लो संविधानसभाको शुरूदेखि दोस्रो संविधानसभाको नौ महिनाको अवधिमा नमिलेका विवादित विषयमा सहमति जुटाउन हरसम्भव प्रयास गर्ने नेताहरूले बताएका छन्।
मंगलबार दिनभर एक्ला एक्लै, दुईपक्षीय र सामूहिक छलफलमा जुटेपनि सबै आफ्ना आफ्नै अडानमा रहेकाले कुनै पनि विषयमा सहमति निर्माण हुन सकेको थिए।
संविधान निर्माण गर्दा राज्य पुर्नसंरचना, शासकीय स्वरुप, निर्वाचन प्रणाली र न्याय प्रणालीबारे दलहरुबीच विवाद कायम रहेपछि संबैधानिक राजनीतिक संवाद तथा सहमति समतिका सभापति बाबुराम भट्टराईले नेताहरुलाई निर्णायक वार्ताका लागि तीनदिने गोप्य बैठक आयोजना गरेका हुन।
बैठकमा कांग्रेसका तर्फबाट देउवा बाहेक उपसभापति रामचन्द्र पौडेल र महामन्त्री कृष्णप्रसाद सिटौला, एमालेका अध्यक्ष ओली, महासचिव इश्वर पोख्रेल र नेता माधवकुमार नेपाल र एमाओवादीका तर्फबाट भट्टराईका साथै अध्यक्ष पुष्पकमल दाहाल र उपाध्यक्ष नारायणकाजी श्रेष्ठ सहभागी रहेका छन्।
विवादित विषयमा कांग्रेस र एमालेबीच खासै ठूलो मतभेद नभएपनि एमाओवादीले मधेसवादी दल लगायत अन्य साना जातिय पहिचानको पक्षमा रहेका दलहरुको साथमा राज्य पुर्नसंरचना, शासकीय स्वरुप र निवार्चन प्रणाली जस्ता विषयमा गम्भीर मतभेद राख्दै आएको छ।