संविधानका विवादित विषयमा सहमति खोज्न गोकर्ण रिसोर्ट पुगेका प्रमुख तीन दलका नेताहरुको बैठक बिना निश्कर्ष स्थगित भएको छ।
मंगलबार दिनभर रिसोर्ट बसी एक्लाएक्लै र सामूहिक वार्तामा व्यस्त रहेका कांग्रेस, एमाले र एमाओवादीका नेता आ–आफ्नै अडानमा रहेपछि भोलि बिहान नौ बजे पुनः औपचारिक बैठकमा सहभागी हुने भन्दै केही नेताहरु बाहिरिएका छन्।
आवासीय बैठकमा सहभागी हुन पुगेका नेताहरुमध्ये कांग्रेसका उपसभापति रामचन्द्र पौडेल, एमालेका अध्यक्ष केपी शर्मा ओली र एमाओवादी अध्यक्ष पुष्पकमल दाहाल रिसोर्टमा नबसी भोलि बिहान ९ बजे आइपुग्ने भन्दै आफ्नो निवासतर्फ फर्किएका छन्।
बैठकस्थलबाट बाहिरिएर निवास फर्कदै गरेका कांग्रेस उपसभापति पौडेलले साँझ साढे ६ बजे सेतोपाटीसँग कुरा गर्दै आजको बैठक सकिएको जानकारी दिए।
दिनभर हामीहरु एक्ला एक्लै, दुईपक्षीय र सामूहिक छलफलमा जुटेपनि सबै आफ्ना आफ्नै अडानमा रहेको कारण आज कुनै पनि विषयमा सहमति निर्माण हुन सकेन, पौडेलले भने।
अघिल्लो संविधानसभाको शुरूदेखि दोस्रो संविधानसभाको नौ महिनाको अवधिमा नमिलेका विवादित विषयमा नेताहरुको एकान्तबासले सहमति कायम गर्ने कत्तिको सम्भावना रहेको छ भन्ने प्रश्नको जवाफमा पौडेलले भने, अहिले नै केही भन्ने स्थिति छैन।
प्रमुख दलका नेताहरुबीचको गोप्य र निर्णायक भनिएको वार्ताबाट निकास निस्कन्छ भनि जनताले विश्वास गर्न सक्छन भन्ने अर्को पश्नको जवाफमा पौडेलले भने, जनतालाई अहिले नै सहमति हुन्छ भनि भन्न सक्ने अवस्थामा हामीहरु छैनौ। अहिले सहमति कायम हुन्छ भनेर भोलि फेरि हुन सकेन भने के भन्ने त्यसैले हामी जनतालाई नढाँटीकन कुरा नमिलेको विषयमा कुरा मिलेको छ भन्न सक्दैनौ।'
संवाद समितिका सभापति बाबुराम भट्टराईले सहमतिका लागि तीनदिने आवासीय बैठकका लागि प्रधानमन्त्री एवम् कांग्रेस सभापति सुशील कोइरालालाई समेत आमन्त्रण गरेपनि उनी उपस्थित भएनन्।
सभापति एवम् प्रधानमन्त्री कोइराला बैठकमा किन सहभागी हुन सक्नु भएन भन्ने प्रश्नको जवाफमा कोइरालाले वरिष्ठ नेता शेरबहादुर देउवा र आफू लगायतका नेताहरुले नै वार्ता गरी समाधान गर्न आग्रह गरी आफू अनुपस्थित रहेको जानकारी उपसभापति पौडेलले दिए।
राज्य पुर्नसंरचना, शासकीय स्वरुप, निर्वाचन प्रणाली र न्याय प्रणाली जस्ता विषयमा कांग्रेस, एमाले र एमाओवादीबीच गम्भीर मतभेद कायम रहँदा संविधानसभाको कार्यतालिका प्रभावित हुँदै गएको छ।
