संविधानका विवादित विषयमा सहमतिलागि गोप्य छलफल गर्न गोकर्ण रिसोर्ट पुगेका प्रमुख तीनदलका शीर्ष नेताहरु अहिले पार्टीको आन्तरिक छलफलमा जुटेका छन्।
मंगलबार बिहानै राजधानीको उत्तरपूर्वमा अवस्थित रिसोर्टमा पुगेका नेताहरु एक घण्टाअघिमात्रै औपचारिक छलफलमा बसेका नेताहरु अहिले फेरी आन्तरिक छलफलका अलवा दुईपक्षिय छलफलका लागि भिन्दाभिन्दै बसेको बैठकमा सहभागी नेताहरु निकट स्रोतले बतायो।
बैठकमा अरु नेताहरुभन्दा ढिलो एमालेका अध्यक्ष केपी शर्मा ओली पुगेका छन् भने कांग्रेसका बरिष्ठ नेता शेरबहादुर देउवा बैठकस्थलबाट बाहिरिएका छन्।
संविधान निर्माण गर्दा राज्य पुर्नसंरचना, शासकीय स्वरुप, निर्वाचन प्रणाली र न्याय प्रणालीबारे दलहरुबीच विवाद कायम रहेपछि संबैधानिक राजनीतिक संवाद तथा सहमति समतिका सभापति बाबुराम भट्टराईले नेताहरुलाई निर्णायक वार्ताका लागि तीनदिने गोप्य बैठक आयोजना गरेका हुन।
बैठकमा कांग्रेसका तर्फबाट देउवा बाहेक उपसभापति रामचन्द्र पौडेल र महामन्त्री कृष्णप्रसाद सिटौला, एमालेका अध्यक्ष ओली, महासचिव इश्वर पोख्रेल र नेता माधवकुमार नेपाल र एमाओवादीका तर्फबाट भट्टराईका साथै अध्यक्ष पुष्पकमल दाहाल र उपाध्यक्ष नारायणकाजी श्रेष्ठ सहभागी रहेका छन्।
विवादित विषयमा कांग्रेस र एमालेबीच खासै ठूलो मतभेद नभएपनि एमाओवादीले मधेसवादी दल लगायत अन्य साना जातिय पहिचानको पक्षमा रहेका दलहरुको साथमा राज्य पुर्नसंरचना, शासकीय स्वरुप र निवार्चन प्रणाली जस्ता विषयमा गम्भिर मतभेद राख्दै आएको छ।
