कतिपय सभासदहरुको विरोधका बाबजूद संविधानका विवादित विषयमा सहमति निर्माण गर्न संविधानसभाले संबैधानिक राजनीतिक संवाद तथा सहमति समितिको समयाबधि कार्तिक १५ गतेसम्म थप गरेको छ।
तीन पटकसम्म समय दिंदा समेत संविधानका आधारभूत विषयमा सहमति कायम गर्न पनि नसकेको र प्रक्रियाबाट टुंगोमा पुर्याउन आवश्यक प्रश्नावली पनि बनाउन नसकेकोे समितिलाई प्रमुख दलका नेताहरुको आग्रहमा चौथो पटक समय थप गरिएको हो।
संवाद समितिका सभापति बाबुराम भट्टराईले विवादित विषयमा सहमतिको प्रयास जारी रहेकोले सहमति निर्माणका लागि थप समय आवश्यक भएको धारणा सहित कार्तिक २ गते संविधानसभाको बैठकमा समितिको प्रतिवेदन पेश गरेका थिए।
उक्त प्रतिवेदनमाथिको सामान्य छलफल पश्चात संविधानसभा अध्यक्ष सुभासचन्द्र नेम्वाङले मंगलबार समितिलाई आवश्यक सहमति निर्माण गरी असहमतिका बुँदामा प्रश्नावली सहित कार्तिक १५ गतेभित्र प्रतिवेदन तयार पार्न निर्देशन दिएका हुन।
त्यसअघि प्रतिवेदनमाथिको छलफलमा भाग लिदैं कतिपय सभासदहरुले दलहरुको आफ्नो अडानका कारण कार्तिक १५ गते हैन जति सुकै समय थप गरेपनि सबै विषयमा सहमति निर्माण हुन नसक्ने ठोकुवा गर्दै माघ ८ गते संविधान जारी गर्न प्रक्रियबाट अगाडि बढ्नु पर्ने धारणा राखेका थिए।
संविधान निर्माण गर्दा राज्यको पुर्नसंरचना, शासकीय स्वरुप, निर्वाचन प्रणाली र न्याय प्रणाली जस्ता मुख्य विषयमा प्रमुख राजनीतिक दलहरुबीच गम्भिर मतभेद कायमै रहेपछि संवाद समिति सहमति निर्माणमा पटक पटक असफल बन्दै आएको छ।
निर्धारित समयमा दलहरुबीच सहमति कायम हुन नसकेपछि प्रमुख दुई ठूला दल नेपाली कांग्रेस र एमालेले असहमतिका बुँदाहरुलाई संविधानसभा नियमावली अनुसार प्रक्रिया (मतदान) बाट टुंगो लगाउन दबाब दिए पनि एमाओवादी लगायत मधेसवादी र जातिय पहिचान पक्षधर दलको दबाब सहमतिका लागि अन्तिम मौका समितिलाई दिइएको हो।
संविधानसभामा समितिको प्रतिबेदनमाथि सभासदहरुले आफ्ना धारणा राखीरहदा प्रमुख तीन दलका शीर्ष नेताहरु भने सहमति खोज्न नाउँमा तीनदिने आवासीय बैठक बस्ने भन्दै राजधानी नजिक उत्तरपूर्वमा रहेको गोकर्ण रिसोर्टमा जुटिरहेका छन्।
राजनीतिक दलहरुले माघ ८ गतेभित्र संविधान जारी गर्ने प्रतिबद्धता अनुसार काम गर्न पनि दलहरुले विवादित विषयको टुंगो कार्तिक १५ गतेभित्र गरी नसके समयसिमाभित्र संविधान निर्माण गर्न कठिनाई हुने संविधान मस्यौदा समितिका सभापति एवम् कांग्रेस महामन्त्री कृष्णप्रसाद सिटौलाले बताएका छन्।
