संविधानका विवादित विषयमा सहमति खोज्न प्रमुख दलका शीर्ष नेताहरू छलफलमा सक्रिय भएका छन्। नेपाली कांग्रेस, नेकपा एमाले र एमाओवादीका शीर्ष तीन तीन जना नेताहरू छलफलका लागि मंगलबार बिहानै गोकर्ण रिसोर्ट पुगेका छन्।
संविधानमा विवादित रहेको साशकीय स्वरुप, संघीयता, न्यायप्रणाली र निर्वाचन प्रणालीमा दलहरुबीच सहमती जुटाउन छलफल केन्द्रीत हुने एक नेताले बताए।
चार वटै विषयमा सत्तारुढ दल कांग्रेस र एमाले केही लचक भएपनि एमाओवादीले फरक अडान लिएको कारण सहमती हुन सकिरहेका छैनन्। कांग्रेस र एमाले दुवै दल ७ प्रदेशको अडानमा छन्।
बैठकमा कांग्रेसबाट पार्टी सभापति एवं प्रधानमन्त्री सुशील कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, एमालेबाट अध्यक्ष केपी शर्मा ओली, नेता माधवकुमार नेपालसहितका नेताहरू सहभागी छन्।
एमाओवादीबाट अध्यक्ष पुष्पकमल दाहाल, बाबुराम भट्टराई र नारायणकाजी श्रेष्ठ सहभागी छन्।