नेकपा एमालेका वरिष्ठ नेता एवम पूर्वप्रधानमन्त्री माधवकुमार नेपालले आउने तीन दिन नेताहरुका लागि अग्नी परीक्षाको दिन रहेको बताएका छन्।
तिहार र छठ पर्वको अवसरमा प्रेस चौतारी पर्साले आयोजना गरेको शुभकामना आदान प्रदान तथा चियापान कार्यक्रममा नेता नेपालले यस्तो धारणा व्यक्त गरेका हुन्। नेपालले विवादास्पद विषयहरुका बारेमा सहमतिको लागि आउने तीन दिन क्रुसियल समय रहेको बताउँदै हामी सबै नेताहरुको अग्नी परिक्षाको समय रहेको बताए।
उनले भनरे, 'आउने तीन दिन एकदम क्रुसियल हुँदैछ। तीन दिनमा सहमति भयो भने समयमा संविधान आउने छ। तर, सहमती भएन भने के हुने छ? ठेकान छैन। मुलुक ठूलो प्रशव बेदनाबाट गुज्रने छ।' सघीयता, साशकीय स्वरुप र न्यायपालिकाको बारेमा सहमति हुन आवश्यक रहेको उनको भनाइ थियो।
नेता नेपालले जातीयताको आधारमा कुनैपनि हालतमा संघीयता नहुने स्पष्ट पार्दै पहिचान र सामर्थयको आधारमा सातवटा संघीय राज्य हुनुपर्ने आफूहरुको धारणा बताए।
चियापान कार्यक्रममा नेता नेपालको भाषण सुरु हुनु भन्दा पहिला नै एमालेका पर्सा क्षेत्र न २ र ३ का सभासद विचारी यादव र राजकुमार गुप्ता मञ्चबाट हिँडेका थिए। उनीहरु हिडेपछि पार्टीमा विद्यमान रहेको गुट उपगुटको बारेमा चर्चा चलेको थियो।
मञ्चबाट हिडेका सभासदहरु केपी ओली गुटको भएको उनीहरुलाई नेता नेपालको भाषण मन नपरेर हिँडेको कार्यक्रमपछि कार्यकर्ताहरुबाट चियापानको समयमा चर्चा चलेको थियो।
सभासदहरु हिडेको बारेमा क्षेत्रको कार्यकर्ताहरुको मुद्दा मिलाउन सभासदहरु कार्यक्रम सकिनु अगाडि नै हिँडेको जिल्लाका एक नेताले बताए।